Փետրվարի 23-ին տեղի ունեցավ ԵԱՀԿ խորհրդարանական վեհաժողովում ՀՀ ԱԺ պատվիրակության հանդիպումը ՀՀ-ում Շվեդիայի Թագավորության արտակարգ եւ լիազոր դեսպան Պատրիկ Սվենսոնի հետ: Այս մասին տեղեկանում ենք ԱԺ պաշտոնական կայքից։
ԵԱՀԿ ԽՎ-ում ՀՀ ԱԺ պատվիրակության ղեկավար Հայկ Կոնջորյանը ներկայացրեց Արցախի դեմ Ադրբեջանի սանձազերծած պատերազմի հետեւանքով ստեղծված իրավիճակը: Մասնավորապես, բարձրաձայնվեց Ադրբեջանում գտնվող հայ ռազմագերիների հարցը, նշվեց, որ Ադրբեջանը, հրաժարվելով վերադարձնել հայ ռազմագերիներին, ոտնահարում է նոյեմբերի 9-ին ստորագրված եռակողմ հայտարարությունը, ինչպես նաեւ միջազգային մարդասիրական իրավունքի նորմերը:
Հայաստանյան պատվիրակության անդամները կարեւորեցին միջազգային հանրության թիրախային եւ հասցեական ճնշումների գործադրումը Ադրբեջանի նկատմամբ, որպեսզի վերջինս կատարի եռակողմ հայտարարությամբ ստանձնած պարտավորությունները:
Նշվեց, որ Արցախի հարցի վերջնական կարգավորման հիմքում պետք է դրված լինի Արցախի ժողովրդի ազատ ինքնորոշման իրավունքը, կարգավորման հարցը պետք է գտնվի ԵԱՀԿ Մինսկի խմբի եռանախագահության ձեւաչափում:
«Մարդասիրական խնդիրները պետք է կարգավորվեն ինչպես միջազգային մարդասիրական իրավունքի, այնպես էլ եռակողմ հայտարարության հիման վրա: Խաղաղությունն այլընտրանք չունի, եւ պետք է բոլոր ջանքերը գործադրել, որպեսզի այն հաստատուն լինի»,-իր խոսքում նշեց դեսպանը:
