Զանգեզուրի տրանսպորտային միջանցքը լրացուցիչ խթաններ կստեղծի Սևծովյան տնտեսական համագործակցության կազմակերպության (ՍԾՏՀ) անդամ երկրների միջև առևտրատնտեսական կապերի զարգացման համար:
Այս մասին, ինչպես հաղորդում է «Интерфакс-Азербайджан»-ը, հայտարարել է Ադրբեջանի արտգործնախարար Ջեյհուն Բայրամովը՝ ՍԾՏՀ ԱԳՆ ղեկավարների 43-րդ նիստում։
«2020 թվականի նոյեմբերի 9-ի եռակողմ հայտարարությունը վերջ դրեց Ղարաբաղում ռազմական հակամարտությանը։ Հակամարտության կարգավորումը միաժամանակ նոր հեռանկարներ է բացում տարածաշրջանային համագործակցության, զարգացման և առաջընթացի համար։ 2020 թվականի նոյեմբերի 10-ի համատեղ հայտարարությունը լրացվել է 2021 թվականի հունվարի 11-ին Ադրբեջան-Ռուսաստան-Հայաստան եռակողմ հայտարարությամբ, որը նախատեսում է տարածաշրջանում հաղորդակցության բացում»,- ասել է Բայրամովը:
Նախարարի խոսքով՝ այդ միջոցառումների իրականացումը զգալի փոփոխություններ կբերի Հարավային Կովկաս, որը ՍԾՏՀ տարածաշրջանի կարևոր մասն է:
«Նոր Զանգեզուրի տրանսպորտային միջանցքը կմիացնի ոչ միայն Ադրբեջանին և Թուրքիային, այլև թույլ կտա 30 տարի շարունակ շրջափակման մեջ գտնվող Նախիջևանյան էքսկլավը միացնել Ադրբեջանին և լրացուցիչ կծառայի տրանսպորտային և առևտրային կապերին»,- ասել է Բայրամովը:
Ադրբեջանի ԱԳ նախարարն անդրադարձել է նաև հայ-ադրբեջանական սահմանի սահմանազատման թեմային։ Նա հայտարարել է, որ Ադրբեջանը ներկայումս պետական սահմանի երկայնքով սահմանային վերահսկողության ենթակառուցվածք է կառուցում։
«Մենք Հայաստանին առաջարկում ենք երկկողմ քննարկումներ սկսել սահմանի սահմանազատման և սահմանագծման հետ կապված։ Ադրբեջանը սպասում է Հայաստանի դրական արձագանքին»,- ասել է նա։
