ՏԿԵ նախարար Գնել Սանոսյանի մամուլի խոսնակ Սոնա Հարությունյանը հերքում է, թե Սանոսյանը Գեղամասար խոշորացված համայնքի ղեկավար Հակոբ Ավետյանին ասել է՝ «Ձեր համայնքը ցրելու եմ, դու էլ դատվելու ես»։
Սոնա Հարությունյանը Facebook-ի էջում պարզաբանում է տարածել․
«Համայնքապետի պնդումները բացարձակ իրականությանը չեն համապատասխանում։ Համայնքապետի ու Գնել Սանոսյանի միջև զրույց եղել է 2019 թվականին, երբ Սանոսյանը զբաղեցնում էր Գեղարքունիքի մարզպետի պաշտոնը։ Նշված ժամանակահատվածում համայնքապետի կողմից հարկերի հավաքագրումը շատ ցածր է եղել։ Սանոսյանն Ավետյանին պարզապես բարեկամական խորհուրդ է տվել զբաղվել իր պարտականություններով՝ կա՛մ հարկերը հավաքագրել, կա՛մ պայմանագրերը խզել, կա՛մ դիմել ԴԱՀԿ՝ ինչպես օրենքն է պահանջում, այլապես համայնքապետի վարքագիծը կարող է դիտվել որպես անգործություն և օրենքի հետ խնդիրներ կառաջանան»,- գրել է նա։
Ինչ վերաբերում է համայնքապետի այն պնդումներին, թե խոշորացվող համայնքների բնակիչների կարծիքը հաշվի չի առնվում, ապա նախարարության ներկայացուցիչը մեկնաբանել է, որ այն ևս իրականությանը չի համապատասխանում։
Գնել Սանոսյանի խոսնակը նշել է, որ խոշորացվող համայնքների բնակիչների հետ հանդիպումները պարբերական բնույթ են կրում։ Նախկինում էլ, ներկայում էլ նախարարության ներկայացուցիչները, հասարակական կազմակերպությունների մեր գործընկերներն ամենօրյա ռեժիմով խոշորացվող տարբեր համայնքներում հանդիպումներ են ունենում, լսում ժողովրդի առաջարկությունները, կարծիքները։
Հիշեցնենք, որ համայնքների խոշորացման դեմ բողոքող Գեղարքունիքի մարզի Գեղամասար խոշորացված համայնքի բնակիչները փակել էին Սոթք- Վարդենիս ճանապարհը։ Գեղամասար խոշորացված համայնքի բնակիչները չեն ուզում միավորվել Վարդենիս համայնքին և պահանջում են չեղարկել կառավարության որոշումը։