Անկարան կարող է տարածքային պահանջներ ներկայացնել Ռուսաստանին։ Այս մասին հայտարարել է Մոսկվայում ՆԱՏՕ-ի նախկին ներկայացուցիչ, ԱՄՆ ռազմածովային ուժերի առաջին աստիճանի պաշտոնաթող կապիտան Հարրի Տաբախը:
«Ես չեմ զարմանա, եթե ինչ-որ պահի Էրդողանը, իր ժողովրդականացման, ուժերի համախմբման համար հայտարարի, որ Ղրիմը Թուրքիա է»,- ասել է նա ուկրաինական Observer թերթին տված հարցազրույցում՝ հավելելով, որ շատ թուրքեր թերակղզին համարում են իրենց տարածաշրջանը:
Հիշեցնենք, որ Թուրքիայի նախագահ Էրդողանը, սեպտեմբերի 21-ին ելույթ ունենալով ՄԱԿ-ի Գլխավոր ասամբլեայի 76-րդ նստաշրջանի ընդհանուր քաղաքական բանավեճում, մեկ անգամ ևս հայտարարել է «բռնակցված» Ղրիմի մասին` ընդգծելով Ուկրաինայի տարածքային ամբողջականությունը: Ավելի վաղ Թուրքիան հրաժարվել էր ճանաչել Ղրիմում Պետդումայի ընտրությունները:
Ռուսաստանի Դաշնության նախագահի մամուլի քարտուղար Դմիտրի Պեսկովն ավելի վաղ ասել էր, որ Կրեմլը չի ընդունում նման հայտարարությունները թուրքական կողմից: Նա հույս է հայտնել, որ ապագայում Անկարան կփոխի իր դիրքորոշումը:
