ԵՄ-ն կոչ է անում Հայաստանին և Ադրբեջանին ապաէսկալացնել սահմանային իրավիճակը և վերահաստատում է երկրներին սահմանների սահմանագծման և սահմանազատման աշխատանքներում լրացուցիչ աջակցություն ցուցաբերելու պատրաստակամությունը:
Twitter-ի իր միկրոբլոգում նման գրառում է արել Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարը:
«Ես խորապես մտահոգված եմ սահմանին նոր միջադեպերի և զոհերի մասին հաղորդագրություններով։ Կողմերը պետք է աշխատեն դեէսկալացիայի վրա և լիովին օգտագործեն առկա մեխանիզմները, մասնավորապես՝ երկու երկրների պաշտպանության նախարարությունների միջև թեժ գիծը, որը ստեղծվել է 2021 թվականի նոյեմբերին ԵՄ հովանու ներքո»,- գրել է Կլաարը:
Նա հավաստել է Եվրամիության պատրաստակամությունը սահմանազատման և սահմանազատման աշխատանքներին լրացուցիչ աջակցություն ցուցաբերելու հարցում:
Հիշեցնենք, որ հունվարի 11-ին՝ ժամը 15:15-ի սահմաններում, ադրբեջանական զինուժը կրակ էր բացել Գեղարքունիքի մարզի Վերին Շորժա հատվածում տեղակայված հայկական դիրքերի վրա, ինչի հետևանքով մեկ զինծառայող միջին ծանրության վիրավորում էր ստացել: Ժամը 17:30-ի սահմաններում ադրբեջանական կողմը հրետանու և անօդաչու թռչող սարքերի կիրառմամբ վերսկսել է կրակը հայ-ադրբեջանական սահմանի նշված հատվածում տեղակայված հայկական դիրքերի ուղղությամբ: Հայկական կողմը ձեռնարկել է համարժեք գործողություններ։ Այդ պահին հայտնի է երեք վիրավորների և երեք զոհի մասին։
