Մենք արդեն բավական ժամանակ է, որ ամփոփել ենք աճյունների փորձաքննությունը, և դանդաղող կամ հերթի մեջ մնացած հետազոտություններ արդեն 7-8 ամիս է, ինչ չունենք։ Այս մասին լրատվամիջոցների հետ հանդիպման ժամանակ ասաց ՀՀ առողջապահության նախարար Անահիտ Ավանեսյանը։
Նա նշեց, որ ցավոք, դեպքեր են եղել, երբ ստիպված են եղել ներգրավել այլ երկրների ավելի մասնագիտացված կառույցների։
«Մենք աշխատեցինք Հոլանդիայի մեր գործընկերների հետ, ուղարկեցինք 100 փորձանմուշ, որոնց պատասխաններն արդեն ստացել ենք, գործընթացն ավարտված է»,- ասաց Ավանեսյանը։
Նախարարը նշեց, որ կան այնպիսի մասունքներ, որոնք այնքան են վնասված, որ հետազոտությունն անհնար է իրականացնել, բայց չունեն փորձաքննություններ, որոնք պետք է անել։
Ի հավելումն նախարարն ասաց, որ ավարտված է Աբովյանի աղմկահարույց դեպքի քննությունը, հարցը ծառայողական քննությունից հետո տեղափոխվել է իրավական դաշտ։ Բացի այդ, վերանորոգվել է դատաբժշկական ծառայության Աբովյանի, Մեծամորի, Մարտունու մասնաճյուղը։
Նշենք, որ մինչ այժմ հայտնաբերվել է 1706 աճյուն, դրանցից մեկը հայտնաբերվել է անցած շաբաթ Ջրականից։
