Ռուսաստանի կողմից Դոնեցկի եւ Լուգանսկի Ժողովրդական Հանրապետությունների ճանաչումը շատ կարևոր որոշում է, և մենք աջակցում ենք այդ որոշմանը: Այս մասին Armenia Today-ի թղթակցի հետ զրույցում ասել է Արցախի ԱԳՆ ղեկավար Դավիթ Բաբայանը՝ մեկնաբանելով Ռուսաստանի նախագահ Վլադիմիր Պուտինի՝ Դոնեցկի և Լուգանսկի ժողովրդական հանրապետությունները ճանաչելու որոշումը:
Բաբայանը հիշեցրել է, որ այս առումով համապատասխան ուղերձ է եղել ԱՀ նախագահի, արտգործնախարարի և խորհրդարանի նախագահի կողմից:
«Որքան շատ լինեն պետությունների ճանաչման նախադեպերը, այնքան լավ` մեզ համար։ Դա, իհարկե, չի նշանակում, որ քանակական առումով նախադեպերն ինքնաբերաբար Արցախի ճանաչմանը կհանգեցնեն, որովհետև ճանաչումը պայմանավորված է մի շարք գործոններով, այդ թվում՝ աշխարհաքաղաքականությամբ»,-ընդգծեց նա։
Բաբայանը նշել է, որ, ամեն դեպքում, վերոնշյալը շատ կարևոր է: Միևնույն ժամանակ, նրա խոսքով, եթե ժողովուրդը կանգնում է անկախության ճանապարհին, ուրեմն նա կանգնում է էքզիստենցիալ սպառնալիքի առաջ:
«Եվ եթե տվյալ ժողովրդին հաջողվում է կառուցել նորմալ ժողովրդավարական պետություն և խուսափել քաոսից, ահաբեկչությունից, նաև կոռուպցիայից, ապա այն պետք է ճանաչվի»,- նշել է Դավիթ Բաբայանը։
Արցախի ԱԳՆ ղեկավարն ընդգծել է, որ Արցախը հենց այն երկրների ամենավառ օրինակներից է, որոնք արժանի են ճանաչման:
«Դրա համար մենք պետք է համապատասխան քաղաքականություն վարենք, երբեք չմոռանանք մեր ազգային շահերի մասին ու միասնական լինենք»,-եզրափակեց Դավիթ Բաբայանը:
Հիշեցնենք, որ Ռուսաստանի նախագահ Վլադիմիր Պուտինը փետրվարի 21-ին հայտարարել է Դոնեցկի և Լուգանսկի Ժողովրդական Հանրապետությունների ինքնիշխանությունը ճանաչելու մասին: Այդ հանրապետությունների ղեկավարների հետ ստորագրվել են բարեկամության, համագործակցության և փոխադարձ օգնության մասին պայմանագրեր, որոնք արդեն վավերացվել են Պետդումայում և ԴԺՀ և ԼԺՀ խորհրդարանների կողմից:
