Հայաստանի վարչապետի Մոսկվա այցի ընթացքում կստորագրվի փաստաթղթերի մի ամբողջ փաթեթ։ Այս մասին, ըստ «ՌԻԱ Նովոստի»-ի, ասել է ՌԴ նախագահի մամուլի քարտուղար Դմիտրի Պեսկովը։
«Փաշինյանը շատ ինտենսիվ շփումներ ունի ՌԴ կառավարության մակարդակով։ Այնտեղ փաստաթղթերի մի ամբողջ փաթեթ կստորագրվի»,- ասել է Պեսկովը։
Ինչպես երեկ հայտնել է Կրեմլի մամուլի ծառայությունը, ապրիլի 19-ին ՌԴ նախագահ Վլադիմիր Պուտինը բանակցություններ կվարի Հայաստանի վարչապետ Նիկոլ Փաշինյանի հետ։ Նախատեսվում է քննարկել ռուս-հայկական ռազմավարական գործընկերության և դաշնակցային հարաբերությունների հետագա զարգացման արդիական հարցեր։
Կքննարկվի նաև Ռուսաստանի, Հայաստանի և Ադրբեջանի ղեկավարների միջև Լեռնային Ղարաբաղի վերաբերյալ 2020 թվականի նոյեմբերի 9-ին, 2021 թվականի հունվարի 11-ին և նոյեմբերի 26-ին ձեռք բերված պայմանավորվածությունների կատարումը, ներառյալ՝ տարածաշրջանում տնտեսական և տրանսպորտային կապերի վերականգնման միջոցառումները։
ՀՀ կառավարության մամուլի ծառայությունն իր հերթին տեղեկացրել է, որ Նիկոլ Փաշինյանն ապրիլի 20-ին հանդիպումներ կունենա ՌԴ վարչապետ Միխայիլ Միշուստինի, Պետդումայի նախագահ Վյաչեսլավ Վոլոդինի և Դաշնային ժողովի Դաշնության խորհրդի նախագահ Վալենտինա Մատվիենկոյի հետ։ Նախատեսվում է նաեւ Հայաստանի վարչապետի այցը Նիժնի Նովգորոդ։
