«Ժողովուրդ» օրաթերթը գրում է. «Ժողովուրդ» օրաթերթի տեղեկությունների համաձայն՝ ՀՀ քննչական կոմիտեն օրերս բացատրություն տալու նպատակով ՊՊԾ պետ Սարգիս Հովհաննիսյանին կհրավիրի նախաքննական մարմին՝ լսելու նրա բացատրությունները: Այնուհետեւ՝ ապացույցներն ու հիմքերը ուսումնասիրելուց հետո, կորոշի` հարուցել քրեական գործ, թե ոչ: Ինչպես հայտնի է, ԱԱԾ ՊՊԾ պետ Սարգիս Հովհաննիսյանը, որն աչքի է ընկնում ակցիաների ժամանակ մարդկանց քացի տալու սովորությամբ, երեկ՝ անհնազանդության խաղաղ ակցիաների ընթացքում, Բաղրամյան-Պռոշյան փողոցների խաչմերուկում բռնություն էր կիրառել մասնագիտական աշխատանքը կատարող լրագրող Նարե Գեւորգյանի ու օպերատոր Արման Գալաջյանի նկատմամբ, սպառնալիք հնչեցրել ակցիայի մասնակիցներից մեկի հանդեպ»։
«Հրապարակ» թերթը գրում է. «Գագիկ Ծառուկյան» բարեգործական հիմնադրամն ապրիլի 28-ից մինչեւ մայիսի 5-ը sms քվեարկություն էր հայտարարել՝ հանրությանը ներկայացնելով Հիսուս Քրիստոսի արձանի 12 նմուշ: Երեկ ավարտվել է քվեարկությունը՝ հաղթողը որոշվելու է մրցութային հանձնաժողովի եւ sms-քվեարկությունների համադրմամբ։ Մեզ հայտնի դարձավ, որ ամենաշատ ձայն հավաքել է 2 քանդակ՝ թիվ 1-ը, որը ռուս քանդակագործի առաջարկն է, եւ թիվ 8-ը։ Հանձնաժողովն ընտրելու է այս երկուսից։ Քանդակը տեղադրվելու է Հատիս լեռան գագաթին, որը մեծ շառավղով տեսանելի է հեռվից։ Քանդակը պատվանդանի հետ 70 մետրից ավելի բարձրություն կունենա»:
«Ժողովուրդ» օրաթերթը գրում է. ՀՀ Երեւան քաղաքի առաջին ատյանի ընդհանուր իրավասության դատարանը բավարարել է ԱԺ պատգամավոր Թագուհի Թովմասյանի ներկայացրած հայցը ընդդեմ պատգամավոր Լենա Նազարյանի. իշխանական պատգամավորը պետք է ներողություն խնդրի Թովմասյանից: Թագուհի Թովմասյանի փատաբան Սերգեյ Ոսկանյանն օրաթերթի հետ զրույցում հայտնեց, որ վճիռը բողոքարկվելու է, քանի որ դատարանը պետք է պարտավորեցներ Լենա Նազարյանին ոչ միայն ներողություն խնդրել հենց ԱԺ ամբիոնից, այլեւ գումար բռնագանձեր: Բայց թեեւ դատավճիռը բողոքարկվելու է, այնուամենայնիվ, փաստ է, որ, այսպես, թե այնպես, Լենա Նազարյանը դատարանի պարտադրանքով ներողություն է խնդրելու Թագուհի Թովմասյանից»:
«Իրավունք» թերթը գրում է. «Թերթի տեղեկությունների համաձայն, մի շարք նոր ու հին քաղաքական ուժեր արդեն իսկ սկսել են լրջորեն պատրաստվել հերթական արտահերթ խորհրդարանական ընտրություններին: Այն, որ Նիկոլ Փաշինյանը հեռանալու է, քաղաքական կուլիսներում վստահ են: Նաեւ համոզված, որ անցումային կառավարությունն էլ երկար կյանք չի ունենա: Հետեւապես, աշնանը համապետական ընտրություններն անխուսափելի են: Այնպես որ, այս տարի աշնանը ոչ թե ճտերը, այլ մանդատները կհաշվեն»:
«Հրապարակ» թերթը գրում է. «Երեկ ՔՊ-ական պատգամավորներն ԱԺ-ում հայտարարությունների ժամը նվիրեցին ընդդիմադիրներին, ավելի ճիշտ՝ զբաղված էին նրանց մրոտելու, սկսված պայքարը վարկաբեկելուն ուղղված հակաթեզեր տարածելու գործով։ Օրինակ, թիվ մեկ ուսապարկ Վահագն Ալեքսանյանը հայտարարեց, թե ՀՀ 2-րդ նախագահի որդին թիկնապահների ու ֆիթնես մարզիչի հետ է փողոց փակում։ Մեր տեղեկություններով՝ ՔՊ խմբակցության աշխատանքը կոորդինացողները առավոտ կանուխ պատգամավորներին զգուշացրել էին՝ իրենց էջերում գրառումներ չանել, ելույթներ չունենալ, քանի որ հայտարարությունների ժամին ինչ պետք է՝ կասվի։ Ենթադրվում է, որ մարտավարությունը Փաշինյանն է մշակել, եւ ելույթների լեյտմոտիվն էլ նա է որոշել»:
«Իրավունք» թերթը գրում է. «Թալինում ընտրությունները անցկացնելու ժամկետների փոփոխություններ են տեղի ունեցել: Թալինը համայնքապետ կընտրի ոչ թե հունիսին, այլ՝ սեպտեմբերին: Այսչափ երկար ձգձգման պատճառը, մեզ հասած տեղեկությունների համաձայն, նոր խոշորացումն է: Թալինին միացած երեք տասնյակ համայնքներին միանալու է նաեւ Արագածավանը»:
«Ժողովուրդ» օրաթերթը գրում է. «ՀՀ առողջապահության նախկին նախարար, ներկայիս ԱԺ «Իմ քայլը» խմբակցության պատգամավոր Արսեն Թորոսյանի գործունեությունը հայտնվել է Հաշվեքննիչ պալատի մանրադիտակի տակ: Պալատը հաշվեքննություն է իրականացրել Անախարարությունում, եւ ուսումնասիրվել է նոր կորոնավիրուսային համավարակով պայմանավորված բյուջետային ծախսերի իրականացումը: Ըստ ՀՊ-ի, օրինակ, 2371 դեպքում թեստի արդյունքները համակարգ մուտքագրվել են մի քանի րոպեից մինչև մի քանի օր ավելի շուտ, քան թեստի հանձնման ժամկետն է եղել։ Դեպքով ֆինանսավորվող ԲԿ-ներում արձանագրվել է մեկ պացիենտի մեկ համակարգչային տոմոգրաֆիայի դիմաց բազմակի վճարման դեպք։ Տարբերություններ են արձանագրվել նաեւ մեկ պացիենտի համար կատարված մասնագիտական անձնակազմի վարձատրության եւ դեղորայքային ու բժշկական նշանակության ապրանքների ծախսերի միջեւ»:
