«Հրապարակ» օրաթերթը գրում է. «Մենք գրել էինք, որ քանի դեռ Սերժ Սարգսյանն ու Ռոբերտ Քոչարյանը համաձայնության չեն եկել եւ ասպարեզը չեն զիջել իրենց շրջանակից դուրս մի անձի` վարչապետի թեկնածուին, շարժումը նոր թափ չի ստանա։ Տեղեկացանք, որ նախօրեի ուշ երեկոյան Քոչարյանն ու Սարգսյանը հանդիպել են եւ երկար զրուցել պայքարի հետագա ընթացքի մասին։ Թե ինչ են պայմանավորվել երկու նախկին կամ ներկա զինակիցները, նրանց թիմերում անտեղյակ էին։ Ոմանց կարծիքով՝ հաջողվել է ընդհանուր հայտարարի գալ: Ոմանք դրա ապացույցն էին համարում Արթուր Վանեցյանի՝ նախօրեին հնչեցրած որոշ խոսքեր, մասնավորապես` Արման Թաթոյանին ուղղված խոսքը՝ եթե նա ուզում է քաղաքականությամբ զբաղվել, պետք է գա Ֆրանսիայի հրապարակ կամ որեւէ այլ տեղից սկսի գործունեությունը` հաստատելով կամ հերքելով իր հավակնությունները»։
«Ժողովուրդ» օրաթերթը գրում է. «Ժողովուրդ» օրաթերթի տեղեկությունների համաձայն՝ Հայաստանի Հանրապետության արտաքին գործերի նախարար Արարատ Միրզոյանի կինը՝ Գոհար Աբաջյանը, մոտ մեկ ամսից ավելի է, ինչ ազատվել է աշխատանքից Volo ընկերությունում: Վերջինիս ազատումը տարբեր հարցերի եւ ընկերության աշխատակիցների շրջանում զարմանքի պատճառ է դարձել, թե ինչն է եղել նրա՝ աշխատանքից դուրս գալու պատճառը:
Շատերի կողմից նրա՝ աշխատանքից ազատվելու հանգամանքը մեկնաբանվեց այնպես, թե աշխատանքից դուրս գալու պատճառն այն է, որ նա եւս կարողանա մեկնել բոլոր այն երկրները, որտեղ իր ամուսինը՝ Արարատ Միրզոյանը, պաշտոնապես գործուղվում է: «Ժողովուրդ» օրաթերթը մեկնաբանության համար փորձեց անձամբ զրուցել Գոհար Աբաջյանի հետ, սակայն նա չպատասխանեց ո՛չ մեր հաղորդագրություններին, ո՛չ էլ հեռախոսազանգերին»:
«Հրապարակ» թերթը գրում է. «Մեր տեղեկություններով, հակաիշխանական բողոքի ցույցերը սկսվելուն պես Մոսկվայից Երեւան են ժամանել ՀՀ երկրորդ նախագահ Ռոբերտ Քոչարյանի կրտսեր որդու՝ Լեւոնի մի խումբ ընկերներ։ Մեզ ասացին, որ ապահով ընտանիքներում մեծացած, փափուկ ապրած այս տղաները Լեւոնի հետ երթերի առաջին շարքերում են՝ քայլում են, փողոց փակում, երբեմն էլ տպավորություն ստեղծում, թե Լեւոնի «ախրաննիկներն» են։ Լեւոն Քոչարյանը երեկ չհերքեց մեր տեղեկությունները: «Ընկերներիցս մի քանիսը՝ 4-5 հոգի, այո, եկել են»,- ասաց նա՝ հերքելով տեղեկությունները, թե խոսքը մեծահարուստ տղաների մասին է, որոնք հատուկ ինքնաթիռ են վարձել․ «Սովորական չվերթով են եկել»:
«Փաստ» օրաթերթը գրում է. «Առիթ ունեցել ենք տեղեկացնել, որ իշխանությունները ցանկանում են Ալավերդիում խոշորացնել արդեն իսկ խոշորացված համայնքները: Մի անգամ խոշորացված Ախթալան, Շնողը, Օձունը ցանկանում են միացնել էլի մեկ անգամ արդեն խոշորացված Ալավերդի համայնքին: Սակայն նախօրեին այս հարցով հանրային լսումները Օձունում և Ախթալայում այդպես էլ չեն կայացել: Համայնքների բնակիչները բոյկոտել են լսումները՝ հայտարարելով, որ դեմ են նոր խոշորացմանը: Սակայն, մեր տեղեկություններով, այս խոշորացումը իշխանություններին օդ ու ջրի պես անհրաժեշտ է. նրանք ցանկանում են իրենց թեկնածուին դարձնել քաղաքապետ: Ավելին, արդեն իսկ սկսել են ոչ պաշտոնական «քարոզարշավը»: Այս օրերին նշյալ համայնքներից մենք տեղեկություններ ենք ստանում, որ քպական պատգամավոր Արեն Մկրտչյանը ինտենսիվ պատրաստվում է ընտրությունների. ասում են՝ հենց նա է գլխավորելու ՔՊ-ի ցուցակը»:
«Հրապարակ» թերթը գրում է. «Մարդիկ խոշորացույցով հետեւում են պայքարին` ով հայտնվեց հարթակում, ով քանի անգամ ելույթ ունեցավ, ով որ մասով էր քայլում, ոստիկաններն ում ինչպես են վերաբերվում: Երեկ երթը սկսվելու ժամանակ մարդիկ նկատել էին, որ Արթուր Վանեցյանը բացակայում է, եւ հեռուն գնացող հետեւություններ էին արել: Պարզվեց` Վանեցյանը հիվանդացել է, բարձր ջերմությամբ պառկած է տանը, սակայն կինն ու թիմակիցները մասնակցում էին ակցիաներին: Մեզ ասացին` ամեն ինչ անում են, որ արագ ապաքինվի եւ շարքեր վերադառնա»:
