Ալիևը ցնկացած ճանապարհ էլ կարող է իր ժողովրդին ծախել որպես միջանցք։ Այս մասին ԱԺ-ում լրագրողների հետ զրույցում ասաց ԱԺ իշխող ՔՊ խմբակցության պատգամավոր, Եվրոպական ինտեգրման հարցերի մշտական հանձնաժողովի նախագահ Արման Եղոյանը։
Նա ասաց՝ պետք է հասկանալ, թե ինչ է նշանակում միջանցք։ Բացի դրանից՝ միջազգային բոլոր իրավունքները գործելու են․ անձնագրային ստուգում, մաքս, տուրք։
Պատգամավորը նշեց, որ այսօր աշխարհում շատ բան է փոխվել, և պետք է առաջ գնալ։ Դրա համար անհրաժեշտ է սկսել սահմանի սահմանազատման և սահմանգծման աշխատանքները։
Եղոյանը նշեց, որ ԵԱՀԿ Մինսկի խմբի անդամների միջև հայտնի պատճառներով ծագած խնդիրների պատճառով Հայաստանի և Ադրբեջանի ղեկավարների հանդիպումները տեղի են ունենում առանձին՝ կա՛մ Մոսկվայում, կա՛մ Բրյուսելում։
Նշենք, որ նախագահ Իլհամ Ալիևը մայիսի 24-ին ասել էր, որ Ադրբեջանը և Հայաստանը համաձայնության են եկել «Զանգեզուրի միջանցքի» բացման շուրջ՝ ներառելով և՛ երկաթուղու, և՛ մայրուղու կառուցումը։ Ինչպես հայտնում է ԱՀ նախագահի մամուլի ծառայությունը, այս մասին նա ասել է Թուրքիայի նախագահ Ռեջեփ Թայիփ Էրդողանի հետ հեռախոսազրույցի ընթացքում։
