Բրյուսելում Լեռնային Ղարաբաղի հիմնախնդրի վերաբերյալ տեղի է ունեցել շատ լուրջ քննարկում, որի ընթացքում դրսևորվել է Հայաստանի ու Ադրբեջանի մոտեցումների տարբերությունը։ Քննարկումների արդյունքում համաձայնություն ձեռք չի բերվել ձևակերպումների շուրջ, քանի որ ԵՄ նախագահ Միշելը փորձել է, իր ձևակերպմամբ, հնարավորինս շատ էլեմենտներ ներկայացնել երկու կողմերի դիրքորոշումներից։ Այս մասին ԱԺ-կառավարություն հարցուպատասխանի ժամանակ նշեց ՀՀ վարչապետ Նիկոլ Փաշինյանը։
«Եվրամիության խորհրդի նախագահը որոշել է իր կողմից անել քոմենթներ, որն իր կարծիքով, հնարավորինս շատ էլեմենտներ կպարունակեր երկու կողմերի դիրքորոշումներից: Ինչքանով է դա ստացվել և ինչքանով է ճշգրիտ, ուրիշ հարց է»,- ասաց վարչապետը՝ հավելելով, որ մենք մեր դիրքորոշումներն արտահայտել ենք ԼՂ հիմնախնդրի վերաբերյալ, և այդ դիրքորոշումներում չկա որևէ փոփոխություն:
Նիկոլ Փաշինյանը նաև հայտարարեց, որ Բրյուսելում անկլավների հարց չի քննարկվել, բայց Ադրբեջանը պարբերաբար ակնարկում է դրա մասին։
Վարչապետի պնդմամբ՝ որևէ մեկը չի պատրաստվում Արցախի ժողովրդի թիկունքում ինչ-որ բան անել։
