Ընդհանուր առմամբ, և՛ Բրյուսելի, և՛ Մոսկվայի օրակարգային հարցերը, որոնք քննարկվում են Ադրբեջանի հետ, 4-ն են։ Հումանիտար հարցերի մեջ առաջնահոերթ գերիների, անհետ կորածների հարցը, հաջորդը ապաշրջափակումն է, դելիմիտացիան, դեմարկացիան, ինչպես նաև Լեռնային Ղարաբաղի հիմնախնդրի կարգավորումը։ Այս մասին այսօր լրագրողների հետ զրույցում ասել է ԱԽ քարտուղար Արմեն Գրիգորյանը։
«Իսկապես Ադրբեջանի նախագահի խորհրդական Հիքմեթ Հաջիևի հետ հունիսի 26-27-ին հանդիպում էր նախատեսված։ Դրանից առաջ ևս պայմանավորվածություններ են եղել հանդիպման շուրջ, որոնք ևս հետաձգվեցին։ Դեռևս հայտնի չեն հստակ պատճառները, թե ինչու է Ադրբեջանը հետաձգել այդ հանդիպումը։ Մենք ինֆորմացիա ունենք, որ հնարավոր է ապագայում նման հանդիպում լինի, ինչի շուրջ քննարկում կա»,-ասաց նա՝ անդրադառնալով իր և Հաջևի հանդիպման չեղարկմանը։
Հիշեցնենք, որ ադրբեջանական կողմը չեղարկել է Բրյուսելում նախատեսված Գրիգորյան-Հաջիև հանդիպումը, որը պետք է տեղի ունենար հունիսի 27-ին։ Այս մասին առցանց ասուլիսի ժամանակ հայտնել էր վարչապետ Նիկոլ Փաշինյանը՝ հիշեցնելով, որ Անվտանգության խորհրդի քարտուղար Արմեն Գրիգորյանի և Ադրբեջանի նախագահի խորհրդական Հիքմեթ Հաջիևի միջև հանդիպումներ ավելի վաղ եղել են։
