Արագածոտնի, Գեղարքունիքի, Կոտայքի և Տավուշի մարզերում 2023-ի հունվարից նոր պարեկային ծառայության գործարկման համար անհրաժեշտ պարեկային նշանակության ավտոտրանսպորտային միջոցներով ապահովման համար պետությունը 3 մլրդ 107 մլն դրամի պայմանագիր կկնքի «Տոյոտա Երևան»-ի հետ:
Ինչպես կառավարության հուլիսի 21-ի նիստի ժամանակ ասաց ՀՀ վարչապետ Նիկոլ Փաշինյանը՝ պայմանագիր է կնքվում մեկ անձից սկզբունքով, քանի որ ավտոմեքենաների շուկայում խնդիր կա, որի լուծմանը հնարավոր չէ սպասել: Այսպիսի դիրքորոշում ունի կառավարությունը, քանի որ Պարեկային ոստիկանության ներդրման ընդլայնումը կարևոր գործընթաց է և կանգ առնել չի կարող:
«Երբ Շիրակի և Լոռու մարզերում տեղի ունեցավ գործընթացը, տեղյակ եք, որ մեծաքանակ ավտոմեքենաների գնումներ տեղի ունեցան»,- հիշեցրեց Փաշինյանը՝ հավելելով, որ այն ժամանակ էլ կային քննադատություններ, թե, օրինակ, ինչու է պարեկային մեքենաներում 6 «դինամիկ» տեղադրված: Սակայն քննարկումների արդյունքում պարզ դարձավ, թե ինչու:
Նա նշեց, որ պարեկային մեքենաների մակնիշները ու գույները տարբեր են տարբեր մարզերում՝ կախված գնման հնարավորություններից, սակայն նույն դիզայնի մեքենաների համար անհրաժեշտ է սպասել մինչև կարգավորվի ավտոմեքենաների շուկայում դեֆիցիտը:
Ի դեպ՝ Փաշինյանը նաև նշեց, որ բոլոր մեքենաներն ամենագնացներ են:
«Մտքեր կան այս խմբաքանակից ավելի շուտ բերել ու տրամադրել Շիրակի ու Լոռու մարզերին, իսկ փոխարենը այնտեղի «Սեդան»-ները վերցնել, որպեսզի քիչ քանակությամբ, սակայն մայրուղիների վրա հերթապահության համար «Սեդան»-ներ ունենանք»,- ասաց վարչապետը:
Նշենք, որ Հայաստանում Արագածոտնի, Գեղարքունիքի, Կոտայքի և Տավուշի մարզերում պարեկային ծառայության ներդրման նպատակով ձեռք կբերվի 175 ամենագնաց ավտոմեքենա:
Մանրամասները՝ տեսանյութում: