ԱՄՆ Կոնգրեսի Ներկայացուցիչների պալատի հետախուզության հանձնաժողովի նախագահ Ադամ Շիֆը դատապարտել է Ադրբեջանի ագրեսիվ գործողություններն Արցախի ժողովրդի նկատմամբ։ Կոնգրեսականի պաշտոնական կայքի փոխանցմամբ՝ Շիֆը մտահոգություն է հայտնել, որ Ադրբեջանի կողմից Հայաստանի հետ հրադադարի համաձայնագրի ուղղակի խախտման հետևանքով կան զոհեր։
«Սա հազիվ թե առաջին անգամն է, երբ Ադրբեջանը չհրահրված հարձակվում է գործում հայկական ուժերի վրա, և եթե ԱՄՆ-ն անհապաղ միջոցներ չձեռնարկի Ալիևի ռեժիմին պատասխանատվության ենթարկելու համար, դա վերջինը չի լինի»,- ընդգծել է նա
Շիֆը Պետքարտուղարությանը հորդորել է օգտագործել դիվանագիտական բոլոր լծակները՝ լարվածությունը նվազեցնելու և «հայկական ինքնիշխանությանը և Արցախի տարածքային ամբողջականությանն Ամերիկայի անսասան աջակցությունը ցույց տալու համար»։
Նա նշել է, որ բազմիցս կոչ է արել անհապաղ ազատ արձակել բոլոր հայ ռազմագերիներին և գերեվարված խաղաղ բնակիչներին, տասնյակ միլիոնավոր դոլարներ հատկացնել Արցախում մարդասիրական և տնտեսական օգնության համար, կասեցնել ԱՄՆ-ի կողմից Ադրբեջանին հատկացվող պաշտպանական օգնությունը և վերսկսել ԵԱՀԿ Մինսկի խմբին ամերիկյան մասնակցությունը՝ խաղաղ գործընթացը վերակենդանացնելու համար։
«Այս գործողություններից յուրաքանչյուրը կարևոր նշանակություն ունի հայ ժողովրդի պաշտպանության համար։ Սա ազդանշան է, որ Ամերիկան կարող է և պաշտպանելու է ժողովրդավարությունն ամբողջ աշխարհում: Ես միշտ լինելու Հայաստանի և Արցախի ժողովրդի կողքին»,- եզրափակել է Շիֆը։
Armenia Today-ն ավելի վաղ տեղեկացրել էր, որ որ Հայաստանի վարչապետ Նիկոլ Փաշինյանն ԱՄՆ պետքարտուղար Էնթոնի Բլինքենի հետ քննարկել է վերջին օրերին Լեռնային Ղարաբաղում ստեղծված լարված իրավիճակը։
Նշենք, որ օգոստոսի 1-ինց սկսած Արցախի Հանրապետության հյուսիսային և հյուսիս-արևմտյան, ինչպես նաև Հայաստանի հետ կապող Բերձորի միջանցքի հատվածներում ադրբեջանական ստորաբաժանումները դիմել են սադրանքի՝ կատարելով շփման գիծը հատելու փորձեր։ Արցախում շփման գծի լարվածության հետևանքով վիրավորում են ստացել 19 զինծառայողներ, մահացու հրազենային վիրավորում՝ 2 պայմանագրային զինծառայողներ։