Սանկտ Պետերբուրգում ոչ պաշտոնական գագաթնաժողովում ԱՊՀ երկրների ղեկավարներին ամանորյա շնորհավորանքներով «ակումբային մատանիներ» են նվիրել, հայտնում է Pool-ը։
Լրագրողներին հետաքրքրել է Բելառուսի նախագահի ձեռքի անսովոր մատանին։ Նրանք պարզել են, որ «Շնորհավոր Ամանոր» մակագրությամբ նույն մատանիներն ստացել են գագաթնաժողովին ներկա Համագործակցության անդամ երկրների բոլոր ղեկավարները։
Ալեքսանդր Լուկաշենկոյից բացի մատանիներ են ստացել նաև Ռուսաստանի նախագահ Վլադիմիր Պուտինը, Ադրբեջանի նախագահ Իլհամ Ալիևը, Ղազախստանի նախագահ Կասիմ-Ժոմարտ Տոկաևը, Ղրղզստանի նախագահ Սադիր Ջապարովը, Տաջիկստանի նախագահ Էմոմալի Ռահմոնը, Թուրքմենստանի նախագահ Սերդար Բերդիմուհամեդովը, Ուզբեկստանի նախագահ Շավքաթ Միրզիյոևը և ՀՀ վարչապետ Նիկոլ Փաշինյանը։
Մատանու կենտրոնում տեղադրված է ԱՊՀ-ի զինանշանը, իսկ ներսում եռաչափ տառերով գրված են շնորհավորանքները՝ «Շնորհավոր Ամանոր 2023»: Նշված է այն պետության անունը, որտեղ անցկացվել է գագաթնաժողովը՝ Ռուսաստան։ Մատանին պատրաստված է սպիտակ և դեղին ոսկի հիշեցնող նյութերից։
