Նոր Նորքի ոստիկանական բաժանմունքի վրա մարտի 24-ին տեղի ունեցած հարձակման մեջ ՔՊ-ում տեսել են Արևմուտքի հետքը, որն այս կերպ փորձում է ստիպել Հայաստանին արագացնել զիջումների գնալը՝ կնքելով խաղաղության պայմանագիր, գրել է «Ժողովուրդ» օրաթերթը՝ վկայակոչելով իր աղբյուրներին։
Թերթի տեղեկություններով՝ ՔՊ անդամները կարծում են, որ սրանով Արևմուտքը Փաշինյանին նախազգուշացնում է՝ եթե չգործի, իրեն կփոխարինեն առավել ռադիկալ իշխանությամբ, որը կկատարի իրենց պահանջները՝ Բաքվի հետ պայմանագիր կնքելու և Ռուսաստանին տարածաշրջանից դուրս մղելու հարցում։
Մարտի 24-ին՝ ժամը 17:00-ի սահմաններում, երեք զինված քաղաքացի փորձել էր ներխուժել Երևանի Նոր Նորք վարչական շրջանի ոստիկանության բաժնի շենք: 55-ամյա Ա. Մ.-ն նռնակ էր պայթեցրել, ինչի հետևանքով նա և 51-ամյա Վ. Գ.-ն ոտքերի շրջանում բեկորային վնասվածքներ էին ստացել և տեղափոխվել հիվանդանոց, իսկ զինված խմբի երրորդ անդամը՝ 34-ամյա Ս. Հ.-ն, վնասազերծվել էր ոստիկանության աշխատակիցների կողմից: Քննչական կոմիտեն ահաբեկչության հոդվածով քրեական գործ էր հարուցել։
