Հայաստանի վարչապետ Նիկոլ Փաշինյանի գլխին, հնարավոր է, «ուղղակի սարքել են» ՌԴ ԱԳՆ ներկայացուցչի մասին հայտարարություն, հաղորդում են ռուսական ՏԱՍՍ և ՌԻԱ Նովոստի լրատվական գործակալությունները՝ վկայակոչելով Երևանում դիվանագիտական աղբյուրը։
«Հայաստանի ԱԳՆ-ն պարբերաբար մեկնաբանում է այլ երկրների ղեկավարների հայտարարությունները։ Միգուցե Փաշինյանի գլխին ուղղակի սարքել են»,- ԱԳՆ խոսքերն է մեջբերում աղբյուրը։ Ավելի վաղ Նիկոլ Փաշինյանը հայտնել էր, որ ՌԴ ԱԳՆ ներկայացուցիչը չի կարող մեկնաբանել իր խոսքերը։
«Ռուսաստանում արտաքին գործերի նախարարության ներկայացուցիչը չի կարող իմ զրուցակիցը լինել։ Իմ զրուցակիցն է ՌԴ նախագահն ու վարչապետը։ Նույնիսկ Ռուսաստանի նման բարեկամ և հարգված պետության արտաքին գործերի նախարարության ներկայացուցիչը չի կարող մեկնաբանել իմ խոսքերը, այլ պարզապես պետք է ականջին օղ անի»,- ասել է վարչապետը։
ՌԴ ԱԳՆ ներկայացուցիչ Մարիա Զախարովան մայիսի 24-ին կայացած ճեպազրույցի ժամանակ մեկնաբանել է Հայաստանի վարչապետի այն հայտարարությունը, թե Երևանը «դե յուրե կորոշի դուրս գալ ՀԱՊԿ-ից, եթե արձանագրի, որ ՀԱՊԿ-ն ինքն է լքում Հայաստանը մեր երկրի հանդեպ ստանձնած պարտավորությունները չկատարելու պատճառով»:
«Ես տեխնիկապես չեմ հասկանում, թե ինչպես է այդ ամենը այնտեղ կատարվելու: Այս մասին մենք արդեն բազմիցս խոսել ենք։
Եթե սա խոսք է ՀԱՊԿ-ից Հայաստանի դուրս գալու դիրքորոշման լոբբինգի համար, ապա ինձ թվում է, որ մենք դեռ պետք է հասկանանք խոսքերը շահարկելու ողջ վտանգը։ Ինչպե՞ս կարող է ՀԱՊԿ-ը հեռանալ Հայաստանից։ Մենք արդեն խոսել ենք այս մասին, նույնիսկ պարզ չէ, թե ինչն է վտանգված»,- ասել էր Զախարովան:
