ՌԴ ԱԳՆ պաշտոնական ներկայացուցիչ Մարիա Զախարովան հերքել է այն տեղեկությունը, թե Բաքուն իբր «նախապես» զգուշացրել է ռուս խաղաղապահներին Լեռնային Ղարաբաղում «հակաահաբեկչական գործողության» մասին։ Նրա խոսքով՝ ռուս խաղաղապահներն այս մասին իմացել են Բաքվից «ռազմական գործողությունների մեկնարկից մի քանի րոպե առաջ»։
«Դա ճիշտ չէ. տեղեկությունը ռուսական զորախմբին է փոխանցվել ռազմական գործողությունների մեկնարկից մի քանի րոպե առաջ»,- գրել է Զախարովան։
Ադրբեջանի պաշտպանության նախարարությունն այսօր ավելի վաղ հայտարարել էր Լեռնային Ղարաբաղում զինված գործողություն սկսելու մասին։ Գերատեսչությունը Ստեփանակերտի ռմբակոծումն անվանել է «հակաահաբեկչական գործողություն» և հայտնել, որ «ընթացող գործողությունների մասին տեղեկացվել են Ռուսաստանի Դաշնության խաղաղապահ զորախմբի հրամանատարությունը և թուրք-ռուսական մոնիտորինգի կենտրոնի ղեկավարությունը»։
Մինչ այս Ադրբեջանի գլխավոր դատախազությունը, ՆԳՆ-ն և Պետական անվտանգության ծառայությունը համատեղ հայտարարություն էին տարածել, որ սեպտեմբերի 19-ի առավոտյան Ֆիզուլի-Շուշի ճանապարհին մահացել են Ադրբեջանի ՆԳՆ չորս աշխատակիցներ. պայթեցվել է «հայկական անօրինական զինված խմբավորումների կողմից տեղադրված ականով»:
