Թուրքիայի արտգործնախարար Մևլութ Չավուշօղլուն հայտնել է, որ թեև Ռուսաստանի հետ ունեցած մի շարք հարցերում գոյություն ունեն տարաձայնություններ, այնուամենայնիվ, Անկարան մշտական կապի մեջ է Մոսկվայի հետ: Այս մասին հայտնում է Ermenihaber.am-ը։
Ըստ Չավուշօղլուի՝ Թուրքիան Ռուսաստանի հետ կապ է պահպանում այնպիսի գոտիներում, ինչպիսիք են Սիրիան Լիբիան և Ղարաբաղը: Այնուամենայնիվ, ըստ նրա, Մոսկվան ու Անկարան շարունակում են «կառուցողական երկխոսությունը»:
Որպես տարաձայնություններից մեկի օրինակ՝ նա մատնանշել է Ղրիմի հարցը, որի կցումը Ռուսաստանին Թուրքիան համարում է «անեքսիա»:
Ուշագրավ է, որ Չավուշօղլուն նաև անդրադարձել է Ռուսաստանից գնած С-400 ՀՕՊ համակարգերի հարցին, որը լուրջ ճգնաժամ է առաջացրել թուրք-ամերիկյան հարաբերություններում:
Թուրքիայի ԱԳՆ ղեկավարի խոսքերով՝ Թուրքիան ու ԱՄՆ-ը համատեղ աշխատանքային խումբ կստեղծեն, որը կզբաղվի С-400-ների գործարքի պատճառով թուրք-ամերիկյան հարաբերություններում առաջացած խնդիրներով: