Լեռնային Ղարաբաղում 44-օրյա պատերազմից հետո Ադրբեջանի պաշտպանության և անվտանգության ոլորտի կորուստները 2020թ. նոյեմբերի 10-ից մինչև 2021թ. հունվարի 31-ը կազմել են 110 մարդ:
Այս մասին հայտնում է Բաքվի Turan գործակալությունը՝ վկայակոչելով ռազմական հետազոտությունների Կասպիական ինստիտուտի հաղորդագրությունը։
Ինստիտուտի տվյալներով՝ 15 զինվորականներ զոհվել են հակառակորդի գնդակից, 10-ը՝ պայթել ականի վրա, մյուսները զոհվել են ոչ մարտական պայմաններում: Զինվորականների զոհվելու դեպքերի մեծ մասը հաստատվել է Ադրբեջանի պաշտպանության նախարարության և ուժային այլ գերատեսչությունների կողմից։
Բացի հակառակորդի գնդակից զոհված 15 և ականի վրա պայթած 10 զինվորականներից, ևս 14 մարդ զոհվել է ուղղաթիռի կործանման հետևանքով, 12-ը՝ ավտովթարից, 12-ը՝ դժբախտ պատահարներից, 10-ը՝ հիվանդություններից, 9-ը՝ անհայտ պատճառներով, 9-ը՝ պատերազմում ստացած վնասվածքներից, 5 – ը՝ ոչ կանոնադրական փոխհարաբերությունների արդյունքում, 2 – ը՝ հատուկ գործողությունների ընթացքում, 12-ը՝ ինքնասպանություն են գործել: Ընդհանուր կորուստներից 84-ը, այդ թվում՝ 11 մարտական և 73 ոչ մարտական, 2021 թվականին են տեղի ունեցել:
Ընդ որում, մինչպատերազմյան 2019 թվականին, ինստիտուտի տվյալներով, կորուստները կազմել են 47 մարդ, նրանցից 9-ը զոհվել է մարտական պայմաններում, 38-ը՝ ոչ մարտական:
2022-ի հունվարին կորուստներն արդեն կազմել են 11 մարդ, այդ թվում՝ 1 զինծառայող զոհվել է հակառակորդի գնդակից, 3-ը մահացել են ոչ կանոնադրական հարաբերությունների արդյունքում, 2-ը՝ անհայտ պատճառներով, 3-ը՝ հիվանդության պատճառով, 1-ը՝ դժբախտ պատահարի հետևանքով, 1-ը ինքնասպանություն է գործել։
Ռազմական հետազոտությունների կասպյան ինստիտուտը կորուստների աճի միտում է նշում, հատկապես՝ ոչ մարտական։