Վրաստանում հունիսի 20-ից տարանցիկ տրանսպորտի վճարը կբարձրանա։ Այս մասին հայտնում է bm.ge կայքը՝ հղում անելով երկրի ֆինանսների նախարարությանը։
Ֆինանսների նախարարությունը պարզաբանել է, որ վերջին տարիներին Վրաստանի բյուջեից զգալի գումար է ծախսվել տարանցիկ երթուղիների կարգավորման վրա, իսկ ընթացիկ տուրքը մնացել է 2010-ինը։
«Ինչպես գիտեք, տարանցման մաքսատուրքը սահմանվել է 2010 թվականի օգոստոսի 1-ից, և 200 լարիի գումարը դեռ գործում է երկրում։ Նշենք, որ վերջին տարիներին միջազգային գործընկերների աջակցությամբ և ավելի քան 5 միլիարդ լարիի բյուջետային միջոցներով Վրաստանը ներդրումներ է կատարել երկրում միջազգային չափանիշներին համապատասխան ճանապարհային ենթակառուցվածքների կառուցման մեջ, և այսօր այդ ենթակառուցվածքը ակտիվորեն օգտագործվում է միջազգային փոխադրողների կողմից: Նշենք նաեւ, որ երկրի ճանապարհային ենթակառուցվածքները պահանջում են սպասարկում, ինչի համար անհրաժեշտ է ունենալ համապատասխան ֆինանսական միջոցներ։ Դրանով է պայմանավորված որոշումը, համաձայն որի տարանցիկ բեռների համար վճարը 200 լարիից կդառնա 350 լարի»,- ասված է ֆինանսների նախարարության հաղորդագրության մեջ։
Կառավարության հունիսի 7-ի որոշման համաձայն՝ հունիսի 20-ից Վրաստանի մաքսային տարածքից տարանցիկ փոխադրվող կամ վերաարտահանվող մեկ բեռնատար մեքենայի համար վճարը կկազմի 350 լարի։
Ընդհանուր առմամբ, 2021 թվականին վրացական միջանցքով անցել է 332,000 տրեյլեր՝ երկրի բյուջե վճարելով 66,4 մլն լարի։
