ՌԴ արտաքին գործերի նախարար Սերգեյ Լավրովն Ադրբեջանի նախագահ Իլհամ Ալիևի հետ հանդիպման ընթացքում հատուկ ուշադրություն կդարձնի Ռուսաստանի, Հայաստանի և Ադրբեջանի ղեկավարների երկկողմ պայմանավորվածությունների իրականացմանը: Այդ մասին հունիսի 22-ին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:
«Հատուկ ուշադրություն է դարձվելու 2020 թվականի նոյեմբերի 9-ի, 2021 թվականի հունվարի 11-ի և նոյեմբերի 26-ի բարձր մակարդակի երկկողմ պայմանագրերի իրականացմանը։ Հիշեցնեմ, որ դրանք կոչված էին ապահովել հայ-ադրբեջանական հարաբերությունների կարգավորումը և Հարավային Կովկասը դարձնել խաղաղության, կայունության և բարգավաճման գոտի»,- նշել է դիվանագետը ճեպազրույցի ժամանակ։
Նշենք, որ ռուսական դիվանագիտության ղեկավարն աշխատանքային այցով Բաքվում կլինի հունիսի 23-24-ը:
Սերգեյ Լավրովը հունիսի 9-10-ն այցելել է Երևան, որտեղ հանդիպել է վարչապետ Նիկոլ Փաշինյանի, նախագահ Վահագն Խաչատուրյանի և ԱԳ նախարար Արարատ Միրզոյանի հետ, ինչպես նաև մասնակցել ՀԱՊԿ ԱԳՆԽ նիստին:
