Թուրքիայի և Վրաստանի արտգործնախարարներ Մևլութ Չավուշօղլուն և Իլյա Դարչիաշվիլին Ստամբուլում կայացած հանդիպման ընթացքում քննարկել են մի շարք հարցեր, այդ թվում՝ տարածաշրջանում տեղի ունեցող իրադարձությունները: Ինչպես հաղորդում են ադրբեջանական լրատվամիջոցները, հանդիպմանը զրուցակիցներն անդրադարձել են նաև Արցախյան հիմնախնդրին։
Չավուշօղլուն շնորհակալություն է հայտնել վրացի գործընկերոջը Թբիլիսիում Ադրբեջանի և Հայաստանի ԱԳ նախարարների հանդիպումը կազմակերպելու համար՝ նշելով, որ ադրբեջանցի գործընկեր Ջեյհուն Բայրամովը գոհ է այդ հանդիպումից: Անդրադառնալով երկկողմ համագործակցության հարցին՝ Չավուշօղլուն իր վրացի գործընկերոջ հետ համատեղ մամուլի ասուլիսի ժամանակ հայտարարել է, որ Թուրքիան մեծ նշանակություն է տալիս Վրաստանի հետ էներգետիկ ոլորտում համագործակցությանը։
«Վրաստանի և Ադրբեջանի հետ իրականացրել ենք շատ նախագծեր, որոնք փոխում են տարածաշրջանը»,- նշել է նա:
Թուրքիայի ԱԳՆ ղեկավարն ընդգծել է, որ Անկարան հանդես է գալիս միջին տրանսպորտային միջանցքի առավել ակտիվ օգտագործման օգտին, որի կարևոր օղակը Բաքու-Թբիլիսի-Կարս երկաթուղին է: Չավուշօղլուն նաև հայտնել է, որ մոտ ժամանակներս Ադրբեջանում կկայանա Ադրբեջանի, Վրաստանի և Թուրքիայի ԱԳ նախարարների եռակողմ հանդիպումը: Իր հերթին, Վրաստանի արտգործնախարար Իլյա Դարչիաշվիլին հայտարարել է, որ Թուրքիայի նախագահ Ռեջեփ Թայիփ Էրդողանը կայցելի Վրաստան։