Թուրքական բանակի ստորաբաժանումները, որոնք տեղակայված են Սիրիային սահմանակից շրջաններում, ավարտել են մերձակա տարածքում ցամաքային գործողության նախապատրաստումը և սպասում են հրամանի՝ այն սկսելու համար։ Այս մասին ТАСС-ի փոխանցմամբ՝ երկուշաբթի հայտնել է TRT հեռուստաալիքը։
Թուրքիայում արգելված Քրդստանի աշխատավորական կուսակցության (ՔԱԿ) և «Ժողովրդական ինքնապաշտպանության ուժերի» գրոհայինների դեմ Սիրիայի հյուսիսում գործողության անցկացման հարցը պլանավորվում է քննարկել երկուշաբթի երեկոյան Թուրքիայի նախարարների կաբինետի նիստում: Աղբյուրները չեն բացառում, որ գործողություն սկսելու որոշումը Թուրքիայի նախագահ Ռեջեփ Թայիփ Էրդողանը կընդունի կառավարության նիստում։
Թուրքիայի պաշտպանության նախարարության հաղորդագրության համաձայն՝ երկրի ռազմական գերատեսչության ղեկավար Հուլուսի Աքարը երկուշաբթի օրը տեսակոնֆերանսի ձևաչափով խորհրդակցություն է անցկացրել թուրքական բանակի հրամանատարական կազմի և սահմանամերձ շրջաններում զորամասերի հրամանատարների հետ: