Իրանի ԱԳ նախարար Հոսեյն Ամիր Աբդոլլահիանն իր ադրբեջանցի գործընկեր Ջեյհուն Բայրամովի հետ հեռախոսազրույցի ընթացքում ընդգծել է, որ երկու կողմերը չպետք է թույլ տան, որ Ադրբեջանի դեսպանատանը տեղի ունեցած միջադեպը բացասաբար կազդի իրենց հարաբերությունների վրա:
Ինչպես հայտնում է ИРНА-ն, Աբդոլլահիան իր ցավակցությունն է հայտնել և դատապարտել միջադեպը՝ ընդգծելով, որ «մենք չպետք է թույլ տանք, որ այդ միջադեպը բացասաբար ազդի երկու երկրների հարաբերությունների վրա»։
Նա առաջարկել է, որ միջադեպի տարբեր ասպեկտները պարզելու համար երկու երկրների անվտանգության մարմինները պետք է շարունակեն և հետաքննեն այս հարցը միմյանց հետ սերտ համագործակցությամբ:
Նշվում է, որ Բայրամովը ողջունել է իր իրանցի գործընկերոջ առաջարկը՝ համագործակցել և համակարգել միջադեպի հետաքննությունը՝ այդ միջադեպի մասշտաբները ճշտելու համար:
Ադրբեջանի ԱԳՆ-ն նաև հաղորդագրություն է տարածել հեռախոսազրույցի մասին, որը մեջբերում են ադրբեջանական լրատվամիջոցները։ Նրանց տեղեկություններով՝ Իրանի ԱԳ նախարարը խոստացել է ամենախիստ պատիժը Թեհրանում Ադրբեջանի դեսպանատան վրա հարձակված անձի համար։
Իր հերթին Բայրամովը կատարվածն անվանել է ահաբեկչական հարձակում «և «հիշեցրել, որ» դիվանագիտական հարաբերությունների մասին Վիեննայի կոնվենցիայի «հիման վրա իրանական կողմը պարտավոր է պաշտպանել դեսպանատան շենքը բոլոր տեսակի հարձակումներից և ապահովել նրա աշխատակիցների անվտանգությունը»:
Հաղորդագրության համաձայն՝ Բայրամովը նաև իրանական կողմից պահանջել է շուտափույթ պատասխանատվության ենթարկել հարձակվողին, մանրակրկիտ հետաքննություն անցկացնել, «բացահայտել և պատժել հանցագործության կազմակերպմանն ու կատարմանը մասնակից մյուս մասնակիցներին»:
Ադրբեջանի ԱԳՆ Տեղեկատվության համաձայն, Աբդոլլահիանը հայտնել է, որ տվյալ փաստի առթիվ Իրանի իրավապահ մարմինների կողմից ներկայումս հետաքննություն է ընթանում, իսկ Ադրբեջանի դեսպանատան և նրա աշխատակիցների անվտանգությունը բարձր մակարդակի է բարձրացվել: Իրանի ԱԳՆ ղեկավարը նաև հայտնել է, որ հետաքննություն է ընթանում Իրանի դիվանագիտական ոստիկանության գործունեության վերաբերյալ, որը պատասխանատու է այն տարածքի համար, որտեղ գտնվում է դեսպանատունը:
Իրանում Ադրբեջանի դեսպանատան վրա հունվարի 27-ի առավոտյան զինված հարձակում է տեղի ունեցել, որի հետևանքով զոհվել է դիվանագիտական առաքելության պահպանության ծառայության պետը, ևս երկուսը վիրավորվել են։ Իրանի ԱԳՆ ներկայացուցիչ Նասեր Կանաանին խստորեն դատապարտել է զինված հարձակումը և հայտնել, որ նախաքննության արդյունքների համաձայն՝ հարձակման հետևում անձնական դրդապատճառներ են եղել:
