Ադրբեջանի ներկայացուցիչներն իսրայելական ընկերության հետ քննարկել են ԱԹՍ-ների արտադրության ընդլայնումը

Ադրբեջանի պաշտպանական արդյունաբերության նախարար Մադաթ Գուլիևը հանդիպել է իսրայելական Aeronautics ընկերության ղեկավար Մոշե Էլազարի հետ։

Ինչպես հայտնել են ադրբեջանական ԶԼՄ-ները՝ վկայակոչելով նախարարությունը, կողմերը մտքեր են փոխանակել «անօդաչու թռչող սարքերի համատեղ արտադրության ոլորտում համագործակցության հետագա ընդլայնման ուղղությամբ»: Նշվում է, որ հանդիպումը կայացել է Աբու Դաբիում IDEX 2023 միջազգային պաշտպանական ցուցահանդեսի շրջանակներում:

Իսրայելական Aeronautics Defense Systems ընկերությունը մասնագիտանում է սպառազինության միջոցների և համակարգերի, մասնավորապես, ռազմական և առևտրային անօդաչու թռչող սարքերի մշակման և արտադրության մեջ:

Ադրբեջանի ԶՈւ սպառազինության մեջ են Aeronautics ընկերության արտադրության Orbiter և Aerostar անօդաչու թռչող սարքերը։ 2009 թվականին Բաքվի և ընկերության միջև ստորագրվեց համաձայնագիր հետախուզական և հարվածային ԱԹՍ-ների արտադրության գործարանի կառուցման մասին։