Իրանն ավարտել է Ռուսաստանից Су-35 կործանիչներ գնելու պայմանագրի ստորագրումը, հաղորդում է Reuters գործակալությունը՝ վկայակոչելով ՄԱԿ-ում Իրանի մշտական ներկայացուցչին:
«Су-35 կործանիչները տեխնիկապես ընդունելի են Իրանի համար, և Իրանն ավարտել է դրանց գնման պայմանագրի ստորագրումը», – գործակալությունը մեջբերել է ներկայացուցչության հաղորդագրությունը: Նշվում է, որ գործարքի մանրամասները չեն հրապարակվում։
Հունվարին Իրանի խորհրդարանի ազգային անվտանգության և արտաքին քաղաքականության հանձնաժողովի անդամ Շահրիյար Հեյդարին հայտնել էր, որ Իրանը Ռուսաստանից գնել է Су-35 կործանիչներ, ինքնաթիռների մատակարարումները սպասվում են գարնանը:
2022 թվականի դեկտեմբերին Իրանին ռուսական Су-35 ինքնաթիռներ մատակարարելու մասին հայտնել է իսրայելական I24 news հեռուստաալիքը՝ վկայակոչելով արևմտյան աղբյուրները։ Հեռուստաալիքի տվյալներով՝ խոսքը, ըստ ամենայնի, 24 Су-35 կործանիչների մատակարարման մասին է, որոնք ի սկզբանե արտադրվել են ռուսական կողմի կողմից Եգիպտոսի համար գործարքի շրջանակներում, որը խափանվել էր Միացյալ Նահանգների կողմից:
