Թուրքիայում ասորիական ծագումով պատգամավոր և սիրիական քրիստոնեական եկեղեցու հետևորդ Ջորջ Ասլանը շնորհավորել է երկրի բոլոր քրիստոնյաների՝ հույների, հայերի և ասորիների Սուրբ Ծնունդը, հայտնում է նա X-ում։
«Շնորհավորում եմ բոլոր քրիստոնյաներին՝ հատկապես Թուրքիայում բնակվող մեր հույն, հայ և ասորի քաղաքացիներին: Հուսով եմ, որ նոր տարին խաղաղություն և սեր կբերի մեր երկրին և ամբողջ աշխարհին։ Շնորհավորում եմ բոլոր պատգամավորների Ամանորը»,- մայրենի արամերենով գրել է պատգամավորը։
Medyascope հեռուստաալիքին տված հարցազրույցում Ասլանը նշել է, որ Թուրքիայի ազգայնական և պահպանողական «Լավ կուսակցության» անդամները խիստ են արձագանքել իր ելույթին։
«Մենք այստեղ չենք եկել այլ մոլորակից։ Մենք այս հողերի բնակիչներն ենք արդեն 12 հազար տարի։ Ինչո՞ւ սա չեք ընդունում»,- պատասխանել է նա մյուս պատգամավորների՝ թուրքերենից բացի այլ լեզվով խոսելու համար իրեն դատապարտող մեղադրանքներին։
Ասլանը խոսել է նաև Թուրքիայում ասորիների խնդիրների մասին, որոնք հիմնականում կապված են գրանցման հետ։
Փետրվարին Թուրքիայի խորհրդարանի հայազգի նախկին պատգամավոր Կարո Փայլանը հարցում էր ուղարկել երկրի ՆԳՆ ղեկավար Սուլեյման Սոյլուին՝ կապված ազգային փոքրամասնությունների և կրոնական կառույցների ղեկավարների դեմ ահաբեկչական հարձակումների սպառնալիքի մասին հաղորդագրությունների հետ։ Նոյեմբերին Ermeni Haber գործակալությունը հայտնել էր, որ Թուրքիայի հայ փոքրամասնությանը պատկանող լրատվամիջոցները 2023 թվականին ֆինանսական աջակցություն չեն ստացել։
