Ղարաբաղյան 44-օրյա պատերազմում հայ զինվորականների զանգվածային կորուստների պատճառներից մեկը ադրբեջանական բանակի կողմից արգելված սպառազինության կիրառումն էր։ Այս մասին գրում է ռուսական դաշնային լրատվական գործակալությունը՝ Avia.pro-ն։
«Մեր տրամադրության տակ հայտնված տվյալների համաձայն՝ ադրբեջանական զորքերը Լեռնային Ղարաբաղի տարածքում գտնվող զինծառայողների և տեղի բնակիչների դեմ բազմիցս արգելված ֆոսֆորային զինամթերք են կիրառել: Այդ հանգամանքը տարածաշրջանում մեծածավալ հրդեհների պատճառ է դարձել, հանգեցրել է մեծ քանակությամբ տեխնիկայի կորստի, շարքից հանել է սպառազինությունը»,-ասվում է հրապարակման մեջ։
Հրապարակման մեջ ներկայացված են վիդեոկադրեր, որոնք անհերքելի ապացույցներ են առ այն, որ խոսքը ոչ թե սովորական լուսային զինամթերքի օգտագործման, այլ հենց ֆոսֆորային զինամթերքի կիրառման մասին է։
«Ադրբեջանական կողմը պաշտոնապես չի մեկնաբանում հնչող մեղադրանքները։ Արգելված զենքի օգտագործմամբ կարող են հետաքրքրվել ՄԱԿ-ում։ Դա Բաքվին կարող է շատ լուրջ խնդիրների առաջ կանգնեցնել, էլ չենք խոսում եվրոպական երկրներում և ԱՄՆ-ում դրա հնարավոր հետաքննության մասին»,- ասվում է Avia.pro-ի հրապարակման մեջ։