Մարտի 12-ին Ադրբեջանի պաշտպանության նախարարությունը ապատեղեկատվություն է տարածել` պնդելով, թե իբր Արցախի ՊԲ ստորաբաժանումները հրաձգային զինատեսակներից կրակ են բացել ադրբեջանական մարտական դիրքերի ուղղությամբ։ Արցախի ՊԲ-ից հերքում են այդ տեղեկությունը։
«Իրականում, ինչպես արդեն տեղեկացրել ենք, մարտի 11-ին, ողջ օրվա ընթացքում, Ադրբեջանի ԶՈՒ ստորաբաժանումներն են պարբերաբար խախտել հրադադարը` ԱՀ Ասկերանի շրջանի Խրամորթ, Փարուխ և Խանապատ գյուղերի ուղղությամբ ականանետերից արձակելով ընդհանուր առմամբ 27 հատ ական: Մարտի 11֊ի լույս 12֊ի գիշերը, տարբեր ուղղություններով, ադրբեջանական կողմը հրադադարը խախտել է հրաձգային զինատեսակների կիրառմամբ»,- նշվում է հաղորդագրության մեջ։
Նշենք, որ վերջին օրերին ադրբեջանական ԶՈՒ-ն Արցախի պաշտպանության բանակի դիրքերի և խաղաղ բնակավայրերի ուղղությամբ տարբեր տրամաչափի զինատեսակներից կրակ է բացում։ Արկակոծության հետևանքով Ասկերանի շրջանի Խրամորթ համայնքի խաղաղ բնակիչ է վիրավորվել։