Մենք չենք պատրաստվում Իլհամ Ալիևի և Նիկոլ Փաշինյանի ցանկությունները կատարել։ Այս մասին Armenia Today-ի հետ զրույցում հայտարարեց Արցախի Հանրապետության Աղավնո համայնքի ղեկավար Գևորգ Չաուշյանն՝ ադրադառնալով Նիկոլ Փաշինյանի՝ առցանց ասուլիսի ժամանակ արված այն հայտարարությանը, որ այն համայնքները, որոնք չեն գտնվում նախկին ԼՂ ինքնավար մարզի տարածքում, պետք է հանձնվեն Ադրբեջանին։
Գյուղապետի պնդմամբ՝ չեն պատրաստվում թողնել իրենց տներն ու դուրս գալ Աղավնոյից՝ Նիկոլ Փաշինյանի վարած սխալ արտաքին քաղաքականության պատճառով։
«Մենք չգիտենք՝ ինքը որ կողմի հետ է բանակցել, թուրքերի՞, թե՞ ռուսների։ Նիկոլ Փաշինյանն անընդհատ զիջողական դիրքերից է բանակցում։ Հետո պատասխանատվությունը գցում է Արցախի վրա՝ նշելով, թե ձեզ համար տներ են կառուցելու»,- նշեց նա։
Ինչ վերաբերվում է Սուս գյուղին Գևորգ Չաուշյանն ասաց, որ այդ տարածքը բնակեցված չէ։
«Հիմա Ալիևը մեծ ցանկություն ունի, ասում է՝ Երևանն ու Սևանն էլ է իրենը, իսկ հայկական կողմը ցանկություն չունի՞։ Մենք չունենք ասելիք, որ ասենք Բաքուն էլ մերն է, փաստացի էլ մերն է՝ ծովից ծով Հայաստան է եղել»,- նկատեց գյուղապետը։
Չաուշյանի խոսքով՝ իրենք չենք պատրաստվում հանձնվել, ինքնապաշտպանության են դիմելու, քանի որ զոհված տղաների հիշատակն է նման սխրագործություն պահանջում։
Աղավնոյի գյուղապետի դիտարկմամբ՝ Փաշինյանի՝ Բերձորի մասին արված հայտարարությունն ավելի շատ ուղղված էր Ռուսաստանի Դաշնությանը։
«Որեւէ մեկն իրեն մանդատ չի տվել, որ հողեր հանձնի։ Իսկ ռուսի դերակատարությունն այստեղ խաղաղապահ առաքելություն իրականցնելն է։ Հիմա ուզում են պորտը կտրել և երեխային սպանել մոր արգանդի մեջ։ Ճանապարհներ զիջելով՝ մենք սպանում ենք Ստեփանակերտն ու մյուս շրջանները։ Նույնը Սյունիքի վիճակն է լինելու։ Հայաստաի ղեկավարը ոչ թե պետք է միայն «դուխով» բառն օգտագործի, այլ՝ լիևի հետ բանակցելիս վիզը չծռի։ 30 տարի թուրքը վախեցել է հայ շարքային զինվորից»,- եզրափակեց նա։
Նշենք, որ առցանց ասուլիսի ժամանակ Նիկոլ Փաշինյանը հայտարարեց, որ Բերձորը շրջանցող ճանապարհի շահագործումից և նոր երթուղու փոփոխության դեպքում այն համայնքները, որոնք չեն գտնվում նախկին ԼՂ ինքնավար մարզի տարածքում, պետք է հանձնվեն Ադրբեջանին։
Սուս գյուղի վերաբերյալ էլ Փաշինյանը նշել է, որ այդ գյուղի վերաբերյալ տեղեկություններ չունի։
Նա նաև ասել է, որ իր տեղեկություններով Լաչինի շրջանում այսօր մարդ չի ապրում։
Ըստ Նիկոլ Փաշինյանի՝ Բերձորի բնակիչների բնակարանային խնդիրները ՀՀ կառավարություն որոշումներով լուծում է, Աղավնո գյուղի բնակիչների խնդիրներն էլ Արցախի կառավարության միջոցներով կլուծվեն։
Հիշեցնենք, որ համաձայն 2020-ի եռակողմ պայմանագրի` Լաչինի միջանցքը իր բնակավայրերով հանձնվելու է Ադրբեջանին այն բանից հետո, երբ կկառուցվի ՀՀ-Արցախ նոր ճանապարհ։