ԱՄՆ-ում հայերի մեծամասնությունը դեմ է Արցախն Ադրբեջանի կազմում լինելուն. հարցում

Հայկական ծագում ունեցող ամերիկացիների ճնշող մեծամասնությունը դեմ է, որ Արցախը հայտնվի Ադրբեջանի իշխանության ներքո։ Այս մասին են վկայում Ամերիկայի Հայ դատի հանձնախմբի (ANCA) կողմից անցկացված հարցման արդյունքները։

Ինչպես հաղորդվում է կոմիտեի կայքում, հայ համայնքն աջակցում է Հայաստանի անվտանգությանը՝ որպես Վաշինգտոնի և Երևանի միջև երկկողմ հարաբերություններում բարձրագույն առաջնահերթություն:

Հարցման տվյալներով՝ հարցվածների 97,65 տոկոսը կարծում է, որ Արցախը երբեք չպետք է ստիպված լինի հայտնվել Ադրբեջանի իշխանության ներքո: 98,4 տոկոսը համաձայն է, որ Հայաստանը բախվում է Ադրբեջանի և Թուրքիայի կողմից գոյություն ունեցող սպառնալիքների հետ։ Հարցման մասնակիցների 95,2 տոկոսը կարծում է, որ Հայաստանի անվտանգությունը պետք է լինի հայ-ամերիկյան երկկողմ հարաբերություններում գլխավոր առաջնահերթությունը:

Հարցվածների 98 տոկոսը դեմ է ԱՄՆ-ի կողմից Ադրբեջանին զենք մատակարարելուն կամ ռազմական օգնություն տրամադրելուն, ինչպես նաև անհրաժեշտ է համարում Բաքվին պատասխանատվության ենթարկել Արցախի դեմ ռազմական հանցագործությունների համար: Բացի այդ, հարցման մասնակիցների 93,6 տոկոսը համաձայն է, որ Թուրքիան պետք է փոխհատուցումներ վճարի հայ ժողովրդին։