«Տաշիր» ընկերությունների խմբի նախագահ և հիմնադիր Սամվել Կարապետյանը շնորհավորել է Ռուբեն Վարդանյանին Արցախի պետական նախարարի պաշտոնում նշանակվելու կապակցությամբ և հույս հայտնել, որ դա տարածաշրջանում խաղաղություն և կայունություն կբերի։ Այս մասին հայտնում է «Տաշիր» ընկերությունների խմբի մամուլի ծառայությունը:
«Ռուբեն Վարդանյանի նշանակումը Արցախի պետական նախարարի պաշտոնում մեծ հույս է ներշնչում հանրապետությունում խաղաղության, զարգացման, բարգավաճման և կայունության համար։ Վստահ եմ, որ դա կօգնի զարգացման և ներդաշնակության նոր փուլ բացել Արցախում»,- ասել է Կարապետյանը։
Նա հույս է հայտնել, որ Վարդանյանի նշանակումն Արցախի պետական նախարարի պաշտոնում թույլ կտա նոր ծրագրեր իրականացնել տարածաշրջանում։
«Ռուբեն Վարդանյանը հայ ժողովրդի իրական հայրենասերներից է, որը պրոֆեսիոնալիզմ ու տաղանդ է դրսևորել թե՛ որպես կայացած գործարար, թե՛ որպես իր ժողովրդի և հայրենիքի խնդիրներից անմասն չմնացող անձնավորություն»,- ասել է Կարապետյանը։
«Տաշիր» ընկերությունների խմբի նախագահը նշել է, որ ապագայում շարունակելու է լայնածավալ ծրագրեր իրականացնել Արցախում։
«Իմ կողմից կշարունակեմ աջակցել տարածաշրջանին տնտեսական, սոցիալական և մշակութային առումներով և մտադիր եմ շարունակել համատեղ նոր լայնածավալ ծրագրերի իրականացումն Արցախի և նրա բնակիչների բարեկեցության դինամիկ աճի համար»,- ասել է Կարապետյանը։
Գործարար Ռուբեն Վարդանյանը հայտարարել էր, որ նոյեմբերի սկզբին պաշտոնապես կզբաղեցնի Արցախի պետական նախարարի պաշտոնը։
Ավելի վաղ Արցախի Հանրապետության նախագահ Արայիկ Հարությունյանը հայտարարել էր Ռուբեն Վարդանյանին Արցախի պետական նախարարի պաշտոնն առաջարկելու իր որոշման մասին։ Արցախի պետական նախարարի պաշտոնակատար Արտակ Բեգլարյանը հայտարարել էր, որ կողմ է այս որոշմանը։
Սեպտեմբերի 1-ին Վարդանյանը հայտարարել էր Ռուսաստանի քաղաքացիությունից հրաժարվելու և Արցախ տեղափոխվելու իր որոշման մասին։ Նա ասել էր, որ տեղափոխությունից հետո ռուսական ողջ ակտիվները կփոխանցի գործընկերներին և ընտանեկան հիմնադրամին։ Վարդանյանը հայտարարել էր նաև Արցախի անվտանգության և զարգացման ճակատ ստեղծելու ծրագրերի մասին։
