Ամերիկայի Հայ դատի հանձնախումբը (ANCA) ԱՄՆ Կոնգրեսին կոչ է արել Արցախին 50 մլն $-ի չափով օգնությունը ներառել տարեվերջին քննարկվող ծախսերի փաթեթում, ասվում է կոմիտեի կայքում:
«Մինչ ԱՄՆ Ներկայացուցիչների պալատն ու Սենատն ավարտում են 117-րդ Կոնգրեսի աշխատանքները, Ամերիկայի Հայ դատի հանձնախումբը կոչ է անում օրենսդիր մարմինների ղեկավարներին 50 մլն $- ի չափով ֆինանսական օգնություն ցուցաբերել Արցախին՝ տարեվերջյան ծախսերի շրջանակներում, որը ներկայումս քննարկվում է», – ասվում է նամակում:
Նշվում է, որ Սենատի Արտաքին հարաբերությունների հանձնաժողովի ղեկավար Բոբ Մենենդեսին ուղղված նամակում ANCA-ի նախագահ Րաֆֆի Համբարյանը երախտագիտություն է հայտնել ԱՄՆ հայ համայնքի և կոալիցիոն գործընկերների անունից Կովկասում ԱՄՆ քաղաքականության վերաբերյալ վերջին լսումների համար:
«Լսումների ընթացքում սենատոր Մենենդեսը դատապարտել է Վաշինգտոնի ռազմական աջակցությունն Ադրբեջանին և հրաժարվել ադրբեջանական և թուրքական ագրեսիայի հետևանքով տեղահանված արցախահայերին օգնելուց», – ասվում է նամակում:
Հաղորդվում է, որ Համբարյանը Կոնգրեսի հայկական հարցերով հանձնախմբի համանախագահ Ֆրենկ Փալոնեին ուղղված նամակում ընդգծել է, որ Բայդենի վարչակազմը, ինչպես և Թրամփի վարչակազմը նախկինում Ադրբեջանի ճնշման տակ վարում է անխոհեմ և անպատասխանատու քաղաքականություն՝ արգելափակելու ամերիկյան մարդասիրական օգնությունն Արցախին։
Նշվում է, որ սեպտեմբերին կոնգրեսական Ֆրենկ Փալոնեն և Նևադայից կոնգրեսական Դինա Տիտուսը Կոնգրեսի ավելի քան 45 անդամների աջակցությամբ դիմել են ԱՄՆ պետքարտուղար Էնթոնի Բլինքենին և USAID-ի ադմինիստրատոր Սամանտա Փաուերին՝ կոչ անելով «անհապաղ միջոցներ ձեռնարկել զգալի միջոցներ հատկացնելու համար»՝ մեծ վտանգի մեջ գտնվող Արցախի հայ բնակչությանը աջակցելու համար։