Եվրախորհրդարանի շուրջ 30 պատգամավորներ Արցախի շրջափակման հարցով դիմել են Եվրոպական խորհրդի նախագահ Շառլ Միշելին և ԵՄ արտաքին հարաբերությունների և անվտանգության հարցերով բարձր ներկայացուցիչ Ժոզեպ Բորելին։
Այս մասին Twitter-ի իր էջում հայտնել է Եվրախորհրդարանի ֆրանսիացի պատգամավոր և արտաքին գործերի հանձնաժողովի անվտանգության և պաշտպանության ենթակոմիտեի նախագահ Նատալի Լուազոն։
«Իմ նախաձեռնությամբ Եվրախորհրդարանի շուրջ 30 պատգամավորներ Լեռնային Ղարաբաղի շրջափակման հարցով դիմել են Եվրոպական խորհրդի նախագահ Շառլ Միշելին և ԵՄ արտաքին հարաբերությունների և անվտանգության հարցերով բարձր ներկայացուցիչ Ժոզեպ Բորելին։ Մենք կոչ ենք անում օպերատիվ գործողություններ ձեռնարկել բնակչության վիճակը թեթևացնելու ուղղությամբ»,-գրել է Լուազոն։
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Ադրբեջանական կողմը դեկտեմբերի 13-ին նաև փակել է Արցախի գազամատակարարումը։
Արցախի պետնախարար Ռուբեն Վարդանյանն գլխավորությամբ ստեղծվել է օպերատիվ շտաբ, որը գործելու է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով:
Դեկտեմբերի 14-ից սկսած բողոքի ակցիաներ են սկսվել ՀՀ-ում տարբեր կառույցների ներկայացուցչությունների և դեսպանությունների մոտ։
Նշենք նաև, որ Կառավարության նիստում վարչապետ Նիկոլ Փաշինյանը հայտարարել է, որ Ադրբեջանը շարունակաբար իրագործում է «Լեռնային Ղարաբաղն առանց հայերի» քաղաքականություն և հայկական կողմն ամեն ինչ պետք է անենք, որ այս քաղաքականությունը պատշաճ միջազգային գնահատականի արժանանա:
Դեկտեմբերի 16-ի վաղ առավոտյան Արցախի պետնախարարը հայտնեց, որ վերականգնվել է Արցախի գազամատակարարումը: