Լաչինի միջանցքի հետ կապված հարցի լուծումը, որը բարձրացնում է Երևանը միջազգային մակարդակով, ՀԱՊԿ-ի պատասխանատվության շրջանակից դուրս է, ասել է կազմակերպության գլխավոր քարտուղար Ստանիսլավ Զասը, փոխանցում է РИА Новости-ն։
«Մեզ չեն դիմել (Հայաստանի կողմից Լաչինի միջանցքի մասով – խմբ.), մենք ելնում ենք նրանից, որ դա ՀԱՊԿ պատասխանատվության գոտուղ դուրս է»,- ասել է Զասը։
Հայաստանը դիմել է ՄԱԿ-ի դատարան և ՄԻԵԴ՝ Լաչինի միջանցքի շրջափակման հետ կապված՝ Ադրբեջանի դեմ միջանկյալ միջոցներ կիրառելու և միջանցքը ապաշրջափակելու պարտավորեցնելու խնդրանքով։ ՄԱԿ-ի Անվտանգության խորհուրդը, Հայաստանի խնդրանքով, դեկտեմբերի 20-ին նիստ կանցկացնի հայ-ադրբեջանական սահմանին տիրող իրավիճակի վերաբերյալ։
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Ադրբեջանական կողմը դեկտեմբերի 13-ին նաև փակել է Արցախի գազամատակարարումը։
Արցախի պետնախարար Ռուբեն Վարդանյանն գլխավորությամբ ստեղծվել է օպերատիվ շտաբ, որը գործելու է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով:
Դեկտեմբերի 14-ից սկսած բողոքի ակցիաներ են սկսվել ՀՀ-ում տարբեր կառույցների ներկայացուցչությունների և դեսպանությունների մոտ։
Նշենք նաև, որ Կառավարության նիստում վարչապետ Նիկոլ Փաշինյանը հայտարարել է, որ Ադրբեջանը շարունակաբար իրագործում է «Լեռնային Ղարաբաղն առանց հայերի» քաղաքականություն և հայկական կողմն ամեն ինչ պետք է անենք, որ այս քաղաքականությունը պատշաճ միջազգային գնահատականի արժանանա:
Դեկտեմբերի 16-ի վաղ առավոտյան Արցախի պետնախարարը հայտնեց, որ վերականգնվել է Արցախի գազամատակարարումը: