Ֆրանսիացի ավելի քան 200 մտավորականներ և արվեստի գործիչներ Սուրբ Ծնունդի նախօրեին կոչ են հրապարակել՝ ի պաշտպանություն Արցախի և արցախահայության: Այն հրապարակվել է հեղինակավոր Le Figaro պարբերականում, հայտնում է Արցախի պետնախարար Ռուբեն Վարդանյանը։
«Շնորհակալ եմ Արցախի 120 հազար հայերին սատարող նրանց խոսքերի համար:
Կմեջբերեմ միայն մի հատված նրանց կոչից. «Սուրբ Ծննդյան այս ժամանակաշրջանում, երբ մենք միանալու ենք մեր հարազատ մարդկանց՝ բոլոր կրոնական սահմաններից դուրս ուրախությամբ նշելու Ընտանիքի տոնը, երբ մեզնից շատերը գուցե մի պահ մտածեն բոլոր նրանց մասին, ովքեր միայնակ են կամ տառապում են, եկեք հիշենք Լեռնային Ղարաբաղի հայերին, որոնց արդեն շուրջ երկու շաբաթ է, ինչ Ադրբեջանը կտրել է աշխարհից:
Այն պահին, երբ մեր երեխաները կբացեն իրենց նվերները, Լեռնային Ղարաբաղի 30 հազար երեխաների ծնողները միայն մեկ փափագ կունենան. այս բարձր լեռներում, որտեղ սրանից ավելի քան երկու հազար տարի առաջ ծնվել են իրենց նախնիները, կարողանան պահպանել իրենց երեխաների կյանքն ու ապագան և այնպես անեն, որ նրանք դանդաղ շնչահեղձ չլինեն»»,-նշել է Վարդանյանը։
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Ադրբեջանական կողմը դեկտեմբերի 13-ին նաև փակել է Արցախի գազամատակարարումը։
Արցախի պետնախարար Ռուբեն Վարդանյանն գլխավորությամբ ստեղծվել է օպերատիվ շտաբ, որը գործում է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով:
Դեկտեմբերի 14-ից սկսած բողոքի ակցիաներ են սկսվել ՀՀ-ում տարբեր կառույցների ներկայացուցչությունների և դեսպանությունների մոտ։
Նշենք նաև, որ Կառավարության նիստում վարչապետ Նիկոլ Փաշինյանը հայտարարել է, որ Ադրբեջանը շարունակաբար իրագործում է «Լեռնային Ղարաբաղն առանց հայերի» քաղաքականություն և հայկական կողմն ամեն ինչ պետք է անենք, որ այս քաղաքականությունը պատշաճ միջազգային գնահատականի արժանանա:
Դեկտեմբերի 16-ի վաղ առավոտյան Արցախի պետնախարարը հայտնեց, որ վերականգնվել է Արցախի գազամատակարարումը:
ՄԱԿ-ի Անվտանգության խորհուրդը քննարկել է իրավիճակը Լաչինի միջանցքում։ Նիստի ընթացքում ԱՄՆ-ի, Ռուսաստանի, Ֆրանսիայի և Մեծ Բրիտանիայի ներկայացուցիչները հայտարարել են միջանցքով երթևեկությունը վերականգնելու անհրաժեշտության մասին: