ՀՀ վարչապետ Նիկոլ Փաշինյանի հնչեցրած մի շարք տեսակետներ առաջացրել են մտահոգություններ, այս մասին Արցախի անվտանգության խորհուրդը հանդես է եկել հայտարարությամբ, հայտնում է Արցախի նախագահի պաշտոնական կայքը։
Հայտարարությունն ընդունվել է Արցախի նախագահ Արայիկ Հարությունյանի գլխավորությամբ հունվարի 11-ին հրավիրված Անվտանգության խորհրդի նիստում, որին մասնակցել են ԱՀ ԱԺ քաղաքական բոլոր ուժերի ներկայացուցիչները:
Հայտարարության մեջ նշվում է, որ Ադրբեջանի նախագահի՝ սույն թվականի հունվարի 10-ին կայացած մամուլի ասուլիսի ընթացքում հնչեցրած մտքերը հերթական անգամ փաստում են, որ Ադրբեջանի իշխանությունների կողմից ղարաբաղյան հիմնախնդրի կարգավորման գործընթացում ուժի սպառնալիքի կիրառման ակնհայտ դրսևորում է, որը շարունակությունն է 2020թ. Արցախի Հանրապետության ժողովրդի դեմ Ադրբեջանի կողմից սանձազերծված 44-օրյա պատերազմի:
«Այս իրողությունների համատեքստում, ՀՀ վարչապետի՝ նախօրեին տեղի ունեցած ասուլիսի ընթացքում հնչեցրած մի շարք պնդումներ և տեսակետներ առաջացրել են մտահոգություններ, քանի որ չեն համապատասխանում ինչպես համազգային պայքարի գաղափարներին, այնպես էլ Արցախի Հանրապետության բնակչության և իշխանությունների որդեգրած դիրքորոշմանը:
Մենք գիտակցում ենք բոլոր այն հետևանքները, որոնք բխում են մեր որդեգրած քաղաքական գծից և վերահաստատում ենք մեր դիրքորոշումն առ այն, որ Արցախի ինքնիշխանությունը և պատմական հայրենիքում ազատ ու անկախ ապրելու իրավունքը բացարձակ արժեքներ են: Որևէ պարտադրանք կամ սպառնալիք չի կարող մեզ հետ պահել պայքարը շարունակելու մեր կայացրած որոշումից»,- ասված է հայտարարությունում:
Անվտանգության խորհուրդը, ըստ այդմ, դիմում է միջազգային հանրությանը` Ադրբեջանի կողմից ձեռնարկված ահաբեկչական գործողությունները, ծրագրվող էթնիկ զտումները և նախապատրաստվող նոր ցեղասպանությունը կանխելու համար պատասխանատվություն ստանձնելու կոչով:
«Արցախի Հանրապետության ժողովուրդը և իշխանությունները վստահ են, որ աշխարահասփյուռ հայությունը կշարունակի սատար կանգնել Արցախի իրենց քույրերի և եղբայրների կայացրած որոշմանը, և ՀՀ իշխանություններին հորդորում են առաջնորդվել բացառապես Արցախի ժողովրդի ինքնորոշման իրավունքը միջազգային ատյաններում առաջ տանելու և պաշտպանելու դիրքորոշմամբ` օգտագործելով միջազգայնորեն ճանաչված պետության բոլոր հնարավորություններն ու ողջ գործիքակազմը»,- նշված է հայտարարությունում:
Անվտանգության խորհրդի նիստում քննարկվել են Ադրբեջանի կողմից Լաչինի միջանցքի արգելափակման պատճառով Արցախում արդեն շուրջ մեկ ամիս տևող հումանիտար ճգնաժամի հետևանքները, դրա վերաբերյալ վերջին օրերին հնչած բարձր մակարդակի քաղաքական հայտարարությունները։
Հիշեցնենք, երեկ տեղի ունեցած ասուլիսի ժամանակ Փաշինյանը արել է Արցախի հետ կապված մի շարք հայտարարություններ, մասնավորապես հայտարարել էր․ «Մենք պետք է մի հարցում կողմնորոշվենք՝ արդյո՞ք մենք որոշում ենք, որ միջազգային հանրության դեմ կռիվ ենք տալիս. այսինքն՝ պատերազմ ենք հայտարարում միջազգային հանրությանը։ Աշխարհում չի եղել և չկա մի երկիր, որը չճանաչեր Լեռնային Ղարաբաղը որպես Ադրբեջանի մաս։ Եվ այդ նոր աշխարհակարգում մենք չենք կարող Հայաստանը դնել զոհասեղանին։ Մենք ունենք ընտրություն՝ տեղավորվել միջազգային զարգացման տրամաբանության մեջ կամ դեմ գնալ դրան։ Մենք ընտրում ենք խաղաղության օրակարգը, դա չի նշանակում, որ խաչ ենք քաշում Լեռնային Ղարաբաղի մեր հայրենակիցների իրավունքների ու անվտանգության վրա»։