Լաչինի միջանցքի՝ արդեն մեկ ամիս շրջափակման վերաբերյալ Ալիևը շարունակում է ստել միջազգային հանրությանը: Այս մասին Twitter-ում գրել է ԱՄՆ կոնգրեսական Ֆրենկ Փալոնը՝ անդրադառնալով Ադրբեջանի նախագահի հայտարարություններին՝ արված վերջին ասուլիսի ժամանակ:
«Ակնհայտ ապացույցներ կան, որ շրջափակումը մարդասիրական ճգնաժամ է առաջացնում Արցախում ՝ արգելափակելով կենսական նշանակության սննդամթերքի և դեղորայքի մատակարարումը քաղաքացիական բնակչությանը։ Առաջիկա օրերին 120 000 անմեղ կյանք կարող է վտանգի տակ հայտնվել։ Մենք չենք կարող ձեռքներս ծալած նստել՝ դիտելով, թե ինչպես է մեր աչքերի առաջ իսկական աղետ ծավալվում։ Ես շարունակելու եմ ամեն ինչ անել, որպեսզի ԱՄՆ-ն օգտագործի բոլոր հնարավոր դիվանագիտական գործիքները՝ վերջ դնելու այս դաժան շրջափակմանը»,- հայտարարել է ԱՄՆ կոնգրեսականը:
Նա հայտարարել է, որ շարունակելու է աշխատել իր գործընկերների հետ:
«Ես աշխատելու եմ նաև իմ հայ գործընկերների հետ, որպեզի աշխարհի առաջնորդներն այս մարդածին աղետին վերջ տալու համար լուրջ միջոցներ ձեռնարկեն»,- հավելել է նա:
Հիշեցնենք, որ դեկտեմբերի 12-ի առավոտյան ժամը 10:30–ից ընդհատված է Շուշիի շրջանի Լիսագոր, Մեծ շեն, Հին շեն և Եղցահող գյուղերի կապը մայրաքաղաք Ստեփանակերտի հետ։ Քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ փակել են Ստեփանակերտ-Գորիս մայրուղին:
Արցախի պետնախարար Ռուբեն Վարդանյանն գլխավորությամբ ստեղծվել է օպերատիվ շտաբ, որը գործում է 24-ժամյա ռեժիմով՝ Ադրբեջանի կողմից Հայաստանի հետ կապող ճանապարհի արգելափակման հետևանքով ստեղծված իրավիճակում աշխատանքների համակարգման նպատակով:
Դեկտեմբերի 14-ից սկսած բողոքի ակցիաներ են սկսվել ՀՀ-ում տարբեր կառույցների ներկայացուցչությունների և դեսպանությունների մոտ։
ՄԱԿ-ի Անվտանգության խորհուրդը քննարկել է իրավիճակը Լաչինի միջանցքում։ Նիստի ընթացքում ԱՄՆ-ի, Ռուսաստանի, Ֆրանսիայի և Մեծ Բրիտանիայի ներկայացուցիչները հայտարարել են միջանցքով երթևեկությունը վերականգնելու անհրաժեշտության մասին:
Դեկտեմբերի 25-ին Արցախում՝ Ստեփանակերտի Վերածննդի հրապարակում, բազմահազարանոց համաժողովրդական հանրահավաք տեղի ունեցավ:
Արցախի կառավարությունը հայտարարել է, որ ժամանակավորապես դադարեցնում է հանքի շահագործումը. որոշում է կայացվել դիմել միջազգային կազմակերպություններին՝ «Բեյզ Մեթըլս» ընկերության գործունեության հետ կապված միջազգային էկոլոգիական փորձաքննություն իրականացնելու համար:
