Պրոցեսները պետք է արագացվեն և Արցախի շուրջ ռազմավարություն մշակվի, որովհետև հապաղելը, դանդաղելը կարող է կործանարար լինել Արցախի և մեր համար, լրագրողների հետ ճեպազրույցի ժամանակ հայտարարել է «Հայաստան» խմբակցության ղեկավար Սեյրան Օհանյանը:
«Արցախյան հակամարտությունն ավարտված չէ, այդ էջը փակված չէ, Ադրբեջանի ագրեսիվ և հանցագործ քաղաքականության արդյունքում սեպտեմբերին տեղի են ունեցել էթնիկ զտումներ, ցեղասպանություն և Արցախը հայաթափվել է, որի համար Ադրբեջանի ղեկավարությունը միջազգային հաթակներում պետք է պատասխանատվության ենթարկվի»,- ընդգծել է նա:
Պատգամավորի խոսքով՝ պետք է խիստ միջոցառումներ ձեռնարկել Արցախի սուբյեկտայնության պահպանման համար. «Դրանք ուղղված պետք է լինեն Արցախի պետական ինստիտուների պահպանմանը և Արցախի ժողովրդի նկատմամբ համապատասխան քաղաքականության իրականցմանը, որպեսզի նրանք մնան ՀՀ-ում՝ հետ վերադառնալու համար: Այս ուղղությամբ աշխատանքների կատարման պատասխանատուները ՀՀ և Արցախի իշխանություններն են»:
Օհանյանը հավելել է, որ միջազգային ընդունված կամ այլ ընդունելի հարթակներում բանակցությունների շարունակականությունն այլընտրանք չունի: «Այս առումով կա որոշակի հապաղում: ՀՀ իշխանությունները պետական ինստիտուտների պահպանման հարցից հրաժարվել են և զբաղվում են միայն սոցիալական, հումանիտար խնդիրներով»,- պարզաբանել է նա:
Մանրամասները՝ տեսանյութում
