Հունվարի 7-ին` ժամը 09.38-ին, ՀՀ ԱԻՆ «911» փրկարար ծառայությունից ոստիկանության Վաղարշապատի բաժնում հաղորդում է ստացվել, որ ծառայություն զանգած անձը հայտնել է, թե Փարաքարի ակումբի մոտ ռումբ է դրված:
Դեպքի վայր են մեկնել ոստիկանության օպերատիվ և ԱԻՆ փրկարարական խմբեր։ Փարաքար համայնքի մշակույթի տանը և հարակից տարածքի զննությամբ պայթուցիկ նյութեր և սարքեր չեն հայտնաբերվել:
Ձեռնարկված միջոցառումների շնորհիվ պարզվել է փրկարար ծառայություն զանգած անձի ինքնությունը։ Ժամը 12.45-ին 41-ամյա կինը հայտնաբերվել է Էջմիածին քաղաքի Գրիգոր Լուսավորչի փողոցում և բերման ենթարկվել ոստիկանության Վաղարշապատի բաժին։ Նա տվել է խոստովանական բացատրություն: Այս մասին հայտնում են Ոստիկանությունից:
Նշենք, որ հունվարի 7-ին Փարաքարի ավագանու նիստ էր նշանակված: «Ապրելու երկիր» կուսակցության թեկնածուի աջակիցները հավաքվել էին Փարաքարի մշակույթի տան բակում: Նրանք փորձեցին ներխուժել համայնքապետարանի շենք, բայց ոստիկանները նրանց թույլ չտվեցին, ինչի հետևանքով տեղի ունեցավ քաշքշուկ: Լարված իրավիճակի և քաշքշուկների հետևանքով մեկ ոստիկան և մեկ քաղաքացի ուշագնաց եղան:
Ի դեպ, ՀՀ ԱԻՆ «911» փրկարար ծառայությունից ոստիկանության Վաղարշապատի բաժնում հաղորդում է ստացվել, որ ծառայություն զանգած անձը հայտնել էր, թե Փարաքարի ակումբի մոտ ռումբ է դրված, բայց պայթուցիկ նյութեր և սարքեր չէին հայտնաբերվել:
