«Նա փոխեց ինձ, նա աշխարհի ամենագեղեցիկ ժպիտն ուներ։ Ես 8 ամիս և 2 օր եղել եմ մոլորակի ամենաերջանիկ մարդը. նրա ժպիտը կարող էր միավորել ժողովուրդներին, իսկ նրա գրկախառնությունը արևից ավելի տաք էր։ Երեկ նա ընկել է մեքենայի տակ և մահացել մեր ապագա դստեր հետ։ Եթե միայն մենք ավելի շատ ժամանակ ունենայինք»։ Այս մասին Facebook-ում գրել է Աշոտ Վարդանյանը՝ Սոնա Մնացականյանի ամուսինը, որը ողբերգական կերպով մահացել է ոստիկանական մեքենայի վթարից։
Աշոտ Վարդանյանը նաև հրապարակել է Սոնայի հետ համատեղ լուսանկարներ։ Նա պատմել է ծանոթության պատմությունը, պատմել հանուն Արցախի նրա բարեգործական գործունեության մասին։
«Մենք հանդիպել ենք 2021 թվականի օգոստոսի 24-ին։ Դա մի տարօրինակ միջոցառում է, նման բան է 60-րոպեանոց պանելային քննարկման. Ես այնուհետև ծախսեցի 59 րոպե՝ նայելով մի աղջկա, ով հետևի շարքում էր. մենք կրկին հանդիպեցինք, և նրա արտասանած յուրաքանչյուր արտահայտության հետ ես ավելի ու ավելի էի սիրահարվում»։
Աշոտ Վարդանյանը նշել է, որ Սոնան միշտ ժամանակ է գտել հետպատերազմյան շրջաններում դպրոցներ կառուցելու նախագծերի համար, միշտ ձգտել է մեծ գործերի:
«Մենք ոչ մի վեճ չենք ունեցել։ Տարբեր երկրների քաղաքացիներ՝ բոլորովին տարբեր կյանքի ուղիներով, մենք, այնուամենայնիվ, շատ նման էինք։ Դա բացարձակ ներդաշնակություն էր և ճշմարիտ երջանկություն։ Նա լիովին փոխել է ինձ. Սոնա. Իմ Սոնան», – գրել է նա։
Ավելի վաղ հայտնի էր դարձել, ապրիլի 26-ի երեկոյան, ժամը 18.05-ի սահմաններում, Պարոնյան-Լեո փողոցների խաչմերուկում Ճանապարհային ոստիկանության «Տոյոտա Պրադո» մակնիշի ավտոմեքենան վրաերթի է ենթարկել հղի կնոջ: Նա մարմնական վնասվածքներով տեղափոխվել է «Նաիրի» բժշկական կենտրոն, որտեղ գիտակցության չգալով մահացել է:
Ավելի ուշ պարզվել է մահացած կնոջ ինքնությունը. նա 28 – ամյա Սոնա Մնացականյանն է, Support Our Heroes-Armenia կազմակերպության աշխատակցուհին, «Արցախի թևեր»ՏՏ կենտրոնի ղեկավարը:
Սոնա Մնացականյանը ծնվել և մեծացել է Արտաշատի շրջանի Բերքանուշ գյուղում։ Անցյալ տարի նա ամուսնացել և եկել է ապրելու Երևանում։
Քննչական կոմիտեն հայտնել է վարորդի ձերբակալման մասին։ Ինչպես հայտնում են տեղական լրատվամիջոցները, սա ճանապարհային ոստիկանության սպայական դասակի հրամանատար Արամ Նավասարդյանն է, ով հայտնի է «Ծեծեմ Արամ» մականունով։ Ավելի ուշ տեսանյութերը հաստատեցին այն տեղեկությունը, որ կնոջը մահացու վրաերթի ենթարկած «Տոյոտա Պրադո»-ն եղել է վարչապետ Նիկոլ Փաշինյանի ավտոշարասյունը:
Վարչապետի աշխատակազմի ղեկավարի տեղակալ Տարոն Չախոյանի տեղեկացմամբ՝ վթարի պահին վարչապետի ավտոմեքենան դեպքի վայրից մոտ 100-150 մետր հեռավորության վրա է եղել։ Այն բանից հետո, երբ վարչապետը տեսավ, որ վրաերթի է ենթարկել հետիոտնին, նա հրահանգեց շտապօգնություն կանչել և պարզել, թե ինչ է տեղի ունեցել։ Չախոյանը նաև տեղեկացրել է, որ վարչապետը հեռախոսազրույց է ունեցել մահացած Սոնա Մնացականյանի հոր հետ և երաշխավորել, որ կկատարվի օբյեկտիվ քննություն: