Աշխարհահռչակ դիրիժոր և ջութակահար Վլադիմիր Սպիվակովը Ֆրանսիա մեկնելու ճանապարհին կարճ ժամանակով հայտնվեց Երևանում և իր պարտքը համարեց այցելել Երևանի պետական բժշկական համալսարանում գործող «Զինվորի տուն» վերականգնողական կենտրոն։
Սպիվակովը Հայաստանի Հանրային հեռուստաընկերությանը տված հարցազրույցում կիսվել է իր տպավորություններով.
«Այն, ինչ արել է Արմեն Մուրադյանը (ԵՊԲՀ ռեկտոր-խմբ.) սխրանք է, մարդկային մեծ սխրագործություն։ Պատերազմն անմարդկային գործողություն է՝ ուղղված մարդու դեմ, նրա կյանքի։ Իսկ մարդկային կյանքն ամենաթանկն է աշխարհում»,- ասել է Սպիվակովը։
Նրա խոսքով՝ ինքը ցնցվել է՝ տեսնելով, թե ինչպես են այնտեղ խնամում հաշմանդամ զինծառայողներին։
«Ի վերջո, հաշմանդամ դարձած այս երիտասարդներից շատերը կորցրել են իրենց երազանքները… Բայց այսօր նրանք պատրաստ են վերադառնալ սոցիալական կյանք՝ որպես նորմալ, հոգեբանորեն առողջ մարդիկ։ Երբ տեսա հաշմանդամներին, որ սայլակներով պարում էին աղջիկների հետ, աչքերիցս արցունքներ հոսեցին»,- խոստովանեց նա։
«Դոստոևսկին մի անգամ ասել է. «Յուրաքանչյուր ոք պատասխանատու է բոլորի համար»: Ահա թե ինչ է անում այս կենտրոնը: Սա եզակի երեւույթ է, ես համոզված եմ, որ Ռուսաստանում կլինի այսպիսի «Զինվորի տուն»՝ հենց տուն, քանի որ իրենք այս տեղն իրենց տունն են անվանել։ Կյանքում շատ կարևոր է զգալ ինչպես տանը»,- ասել է Վլադիմիր Սպիվակովը։
Խոսելով պատերազմների սարսափների մասին՝ Լեռնային Ղարաբաղում՝ Վլադիմիր Սպիվակովն ասում է. «Ողբերգությունը մի օր կավարտվի։ Կարծում եմ, որ ցանկացած իրավիճակում պետք է մարդ մնալ։ Կառլ Յունգն ասում էր՝ «մարդը պետք է չդավաճանի իրեն՝ ուժի առաջ», իսկ դա ներքին սխրանք է պահանջում։ Ե՞րբ է ավարտվելու այս ամենը։ Կարծում եմ, որ մարդկանց բաժանում են ոչ թե սահմանները, ոչ թե ծովերն ու օվկիանոսները, այլ տգիտությունը, ես այսպես կպատասխանեի այս հարցին»։
Մաեստրոն ասաց, որ մինչև տարեվերջ պատրաստվում է գալ Երևան, որտեղ վաղուց չի եղել և կարոտում է, և մի քանի համերգով հանդես գալ, որոնցից մեկը բարեգործական է լինելու՝ համերգի ողջ հասույթը կուղղվի Զինվորի տանը։
