Օգոստոսի 2-ի երեկոյան պարեկային ծառայության Երևանի գնդի ոստիկանները մայրաքաղաքում իրականացրել են ուժեղացված ծառայություն։ Մեկնարկից առաջ անձնակազմին հրահանգավորել են ՀԱԱԳՎ պետ Գեորգի Այվազյանն ու պարեկային ծառայության պետ Արթուր Ումրշատյանը։ Այս մասին հայտնում են Ոստիկանությունից։
Մի քանի ժամ տևած միջոցառման ընթացքում պարեկներն արձանագրել են ճանապարհային երթևեկության կանոնների 344 խախտում։ Մասնավորապես, հայտնաբերվել է ոչ սթափ վիճակում մեքենա վարող՝ 23, առանց վարորդական իրավունքի վկայականի՝ 34 անձ։ 65 տրանսպորտային միջոց շահագործվել է տեխնիկական զննություն չանցած, 15-ը՝ թաղանթապատված դիմապակիով, 1-ի վրա տեղադրված էր գերձայնային ազդանշան։
Պարեկներն ուշադրություն են դարձրել նաև վարելիս ծխելու դեպքերին և հայտնաբերել են նման 30 վարորդի։ 5 անձ էլ տուգանվել է փողոցը չթույլատրված հատվածով անցնելու համար։ Բացի այդ, պարեկները տարբեր կասկածանքով ձերբակալել ու Երևան քաղաքի վարչության տարածքային ստորաբաժանումներ են տարել յոթ անձի։ Նմանօրինակ ծառայությունները պարբերական են։
Նկատենք, որ վերջին օրերին ոստիկանությունը մայրաքաղաքի տարբեր հատվածներում ուժեղացված ծառայություններ է անցկացրել։
Օգոստոսի 1-ին Երևան քաղաքի տարբեր հատվածներում կրկին ռեյդեր էին։ Ինչպես հայտնել է Armenia Today-ի թղթակիցը, տեղական ժամանակով ժամը 19:15-ի սահմաններում՝ մասնավորապես Խանջյան փողոցում, ոստիկանության ծառայողներն ուժեղացված հսկողություն են իրականացրել։
Ճանապարհային ոստիկանության աշխատակիցները կանգնեցրել են մեքենաները, բացել բեռնախցիկները և ստուգումներ իրականացրել։ Armenia Today-ը Ոստիկանությունից ճշտել էր ստուգումների նպատակը։ ՀՀ ոստիկանության ԶԼՄ-ների հետ կապի վարչության պետ Զարզանդ Գաբրիելյանը մեզ հետ զրույցում ասել էր, որ ստուգումները պայմանավորված չեն որևէ կոնկրետ դեպքով, և ուժեղացված ծառայությունները պարբերական բնույթ են կրում։