Մահացել է գեներալ-մայոր, ԱԺ նախկին պատգամավոր Սեյրան Սարոյանը։ Այս մասին հայտնում են լրատվամիջոցները: ԶԼՄ-ների փոխանցմամբ՝ ԱԺ նախկին պատգամավորը մահացել է Երևանի Իզմիրլյան բժշկական կենտրոնում: Սեյրան Սարոյանը առողջական լուրջ խնդիրներ ուներ, և երկար ժամանակ բուժում էր ստանում արտասահմանում:
Տեղեկացնենք, որ Սեյրան Սարոյանը ծնվել է 1967թ․ սեպտեմբերի 3-ին՝ Էջմիածի շրջանի Հայկաշեն գյուղում։ 1993 թ․ ավարտել է ՀՀ պաշտպանության նախարարության բարձրագույն ակադեմիական կուրսերը, 2006 թ․՝ ՌԴ զինված ուժերի գլխավոր շտաբի ռազմական ակադեմիան` «Պետության ռազմական անվտանգություն» մասնագիտությամբ։
1985-1987 թթ․ Սեյրան Սարոյանը ծառայել է խորհրդային բանակում։ Սարոյանը կանգնած է Արցախյան ազատամարտի ակունքներում: Ակտիվ մասնակցություն է ունեցել Ղարաբաղյան շարժմանը։ Նրա հրամանատարությամբ գործող ջոկատը, հետագայում «Արծվիկ-10» գումարտակը կռվել է Քարվաճառ, Քաշաթաղի, Կովսականի ազատագրման ճակատամարտերում։ 1993-ից մինչև 2007 թ․ եղելէ ՀՀ զինված ուժերում գնդի, բրիգադի, բանակային 2-րդ, ապա 4-րդ կորպուսի հրամանատար։
2000 թ․ նրան շնորհվել է գեներալ-մայորի կոչում։ 1994 թ․ ՀՀ նախագահի կողմից պարգևատրվել է «Արիության մեդալով», 1996 թ․՝ «Մարտական խաչ», իսկ 2006 թ․՝ «Հայրենիքին մատուցված ծառայությունների համար» առաջին աստիճանի մեդալներով։ ՀՀ պաշտպանության նախարարի կողմից 1997 թ․ պարգևատրվել է «Մարշալ Բաղրամյան», 2002 թ․՝ «Դրաստամատ Կանայան», 2003 և 2004 թթ․՝ «Անբասիր ծառայության համար» առաջին և երկրորդ աստիճանի մեդալներով։
Հիշեցնենք, որ Սեյրան Սարոյանը եղել է նաև ԱԺ պատգամավոր: 2007 թ․ մայիսի 12-ին ՀՀԿ-ից մեծամասնական ընտրակարգով թիվ 19 ընտրատարածքից ընտրվել է Ազգային ժողովի 5-րդ գումարման պատգամավոր։ Հեղափոխությունից հետո՝ 2018 թվականին, Սեյրան Սարոյանը հեռացել է ՀՀԿ-ից: