Ավանդի դիմաց փոխհատուցում հատկացնելու վճարումը 2022 թվականին ապահովելու և գոյացած հերթացուցակը կրճատելու համար ՀՀ աշխատանքի և սոցիալական հարցերի նախարարությանը կվերաբաշխի միջոցները։ «Ընտանիքի կենսամակարդակի բարձրացմանն ուղղված նպաստներ» միջոցառման կատարողականի համար նախարարության միջոցներից կվերաբաշխվի 310,6 մլն դրամ։
Նշվում է, որ ավանդների փոխհատուցման ցուցակում են 83 և ավել տարեկան մարդիկ, մարտական գործողությունների մասնակից անձինք, որոշ համայնքներից զորակոչված՝ 2014 թվականի օգոստոսի 1-ի դրությամբ պարտադիր ժամկետային զինվորական ծառայության մեջ գտնված անձինք, մարտական գործողություններին մասնակցելու կամ մարտական հերթապահություն կամ հատուկ առաջադրանք կատարելու ժամանակ զոհված զինծառայողների կամ կամավորականների կամ անհայտ կորածների անունով ներդրված ավանդը ժառանգած անձինք:
Պետական բյուջեով փոխհատուցման համար հատկացվել է 1,5 մլրդ դրամ, որը նախատեսվել է վերոհիշյալ սոցիալական խմբերին պատկանող շուրջ 7 900 անձի ավանդների դիմաց փոխհատուցումը տրամադրելու համար։
2022 թվականի սեպտեմբեր ամսվա դրությամբ ավանդի դիմաց փոխհատուցում ստացել է շուրջ 6 400 ավանդատու, որից շուրջ 1 500 ավանդատուն դեռևս 2021 թվականին ավանդի դիմաց փոխհատուցում ստանալու համար դիմած և հաշվառված ավանդատուներն են:
Հունվար-սեպտեմբեր ամիսների ընթացքում ավանդի դիմաց փոխհատուցման վճարման համար ծախսվել է ֆինանսական միջոցների 75%-ը՝ շուրջ 1,125 մլրդ դրամ։ Իսկ սեպտեմբերի 1-ի դրությամբ տեղեկատվական շտեմարանում արդեն իսկ հաշվառված ավանդատուների թիվը կազմում է շուրջ 1 800, որոնց փոխհատուցում դեռևս չի վճարվել։
3 300 տարեց և 150 մյուս սոցիալական խմբերին պատկանող ավանդատուներին փոխհատուցում վճարելու համար մինչև տարեվերջ անհրաժեշտ կլինի հատկացնել 682,5 մլն դրամ:
Ավանդի դիմաց փոխհատուցման վճարումներն ապահովելու համար վճարող կազմակերպությանը վճարման ծառայությունների մատուցման համար հատկացվում է գումարի 1 տոկոսի չափով միջնորդավճար։ Ըստ այդմ, այս միջոցառման գծով անհրաժեշտ կլինի հատկացնել ևս 3,1 մլն դրամ: Այսինքն՝ ծրագրի իրականացման համար անհրաժեշտ կլինի ընդամենը՝ 310,6 մլն դրամ (307,5 + 3,1 = 310,6):
