Popok Animation-ը, որը համագործակցում է համաշխարհային բրենդների հետ, մասնաճյուղ է բացել Երևանում։ Այս մասին Itel.am-ին հայտնել է ստուդիայի համահիմնադիր Աղվան Խաչատրյանը։
«Այս տարի ստուդիան մասնաճյուղ է հիմնել Երեւանում, իսկ մեր թիմը համալրվել է մի քանի բարձրորակ, կասեի՝ ոլորտի ուժեղագույն մասնագետներով։
Գյումրիում մեկ ամսից կտեղափոխվենք ավելի ընդարձակ գրասենյակ, որտեղ կգործի եւ՛ ստուդիան, եւ՛ մեր անիմացիոն դպրոցը, որը մարզերի երիտասարդների հետ շարունակում է աշխատել բացարձակ անվճար», – նշել է նա։
Խաչատրյանի խոսքով՝ անիմացիան ստուդիայի համար ստեղծում են ավելի քան 50 անիմատորներ, հրավիրվում են նաև մասնագետներ արտերկրից, որոնք վարպետության դասեր են անցկացնում ստուդիայի կոլեկտիվի և աշակերտների համար։
«Մեր թիմում կարեւորը մարդն է։ Տարածված կարծրատիպ կա, որ համակարգչով աշխատողները՝ ծրագրավորողները, անիմատորները, գրաֆիկ դիզայներները գիշեր-ցերեկ աշխատում են ու չեն քնում։ Մեզ մոտ հստակ օրենքներ կան աշխատանքի ու կյանքի բալանսը պահելու համար։ Օրինակ՝ մեր ստուդիայում աշխատանքային գրաֆիկն ազատ է: Չկա առավոտյան 9-ին գրասենյակում լինելու պարտադիր պահանջ: Թիմը գալիս ու գնում է, երբ ցանկանա, սակայն բոլորը միշտ պահում են իրենց վերջնաժամկետները:
Միեւնույն ժամանակ կիրակի աշխատելն արգելված է: Ով փորձեց կիրակի օրով գրասենյակ գալ, կտուգանվի (ծիծաղում է՝ խմբ.)։ Նույնիսկ երեկոյան 19։00-ից հետո գրասենյակում մնալը կամ գիշերն աշխատելն ընդունված չէ։ Կարեւորում ենք թիմի առողջությունն ու գործից դուրս կյանքը։
Խրախուսում ենք նաեւ ուսումը. միշտ պատրաստ ենք ֆինանսավորել թիմակիցներին տարբեր կրթական ծրագրերին մասնակցելիս՝ անգլերենի դասերից մինչեւ որակավորումը բարձրացնող անիմացիայի կուրսեր», – ասել է Խաչատրյանը:
Խոսելով ապագա ծրագրերի մասին՝ ստուդիայի համահիմնադիրը տեղեկացրել է, որ 2023 թվականին, բացի Գյումրիից և Երևանից, նախատեսվում է ստուդիա բացել Վանաձորում։
Popok Animation ստուդիան հիմնադրվել է Գյումրիում 2018 թվականին։ Ընկերությունը մատուցում է եռաչափ անիմացիայի եւ գրաֆիկայի ծառայություններ: Համագործակցում է ռուսական СОЮЗМУЛЬТФИЛЬМ, МЕЛЬНИЦА, ЯРКО, ինչպես նաեւ արտասահմանյան այլ ընկերությունների հետ։
Ստուդիան վերջերս մասնաճյուղ է բացել Երեւանում ու շարունակում է պատրաստել եռաչափ անիմացիայի պրոֆեսիոնալ կադրեր։