Օգոստոսի 14-ին ողբերգական ավտովթարի հետևանքով զոհված արցախցի Հելեն Դադայանի աճյունն Արցախ տեղափոխելու հարցով Միջազգային և համեմատական իրավունքի կենտրոնի նախագահ Սիրանուշ Սահակյանը դիմում է ուղարկել Եվրոպական դատարան, գրում է News.am-ը։
Դիմումն ուղարկվել է սեպտեմբերի 6-ի երեկոյան:
«7 աշխատանքային օրերի ընթացքում Եվրոպական դատարանը կհրապարակի որոշումը: Հիմա սպասման մեջ ենք»,- նշել է Սահակյանը:
Օգոստոսի 18-ին արցախցի երիտասարդները Հելեն Դադայանի դին Արցախ տեղափոխելու պահանջով ակցիա են իրականացրել նաև ԿԽՄԿ երևանյան գրասենյակի մոտ։ Օգոստոսի 19-ին Հելենի հարազատները դիմել են ԿԽՄԿ-ին և խաղաղապահներին աճյունն Արցախ տեղափոխելու պահանջով։
Օգոստոսի 14-ին ՀՀ ՆԳՆ-ն հայտնել էր, որ Երևան-Գյումրի ավտոճանապարհի 90-րդ կմ-ին բախվել են «Ֆոլքսվագեն» մարդատար միկրոավտոբուսը և «ԶԻԼ» բեռնատարը, ինչի հետևանքով 11 մարդ մահացել է, վեց վիրավոր հոսպիտալացվել էր։ Դեպքի առթիվ ՀՀ Քննչական կոմիտեն գործ էր հարուցել։ Օգոստոսի 17-ին դատախազը հանրային քրեական հետապնդում է հարուցել վթարի մասնակից՝ «ԶԻԼ» մակնիշի բեռնատարի վարորդ Հ.Պ.-ի նկատմամբ։
Հունիսի 15-ից ադրբեջանական կողմը ամբողջությամբ արգելափակել է Լաչինի միջանցքը՝ թույլ չտալով մարդասիրական ուղևորափոխադրումներն ու բեռնափոխադրումները, ինչպես նաև արգելել է ԿԽՄԿ-ի միջնորդությամբ Արցախից Հայաստան հիվանդների տեղափոխումը։
