Ներքին գործերի նախարարությունը հայտնել է աղետների ռիսկերի նվազեցման, արտակարգ իրավիճակների արձագանքման արդյունավետության բարձրացման և աղետներից հետո վերականգնմանն ուղղված գերատեսչության միջոցառումների մասին։
ՆԳՆ-ն նշել է, որ հաշվի առնելով 1988 թվականի Սպիտակի երկրաշարժի հետևանքները՝ գերատեսչությունն իր առաջնահերթությունն է համարում աղետներին դիմակայելու պատրաստ հասարակության ձևավորումը և հնարավոր արտակարգ իրավիճակներին արդյունավետ արձագանքող պետական կառույցների զարգացումը։
Գործակալությունն աղետների ռիսկերը նվազեցնելու քայլերից մեկն անվանել է Սեյսմիկ պաշտպանության տարածքային ծառայության ստեղծումը՝ սեյսմիկ վտանգների մոնիթորինգի, ռիսկերի նվազեցման, շենքերի տեխնիկական վիճակի և սեյսմիկ խոցելիության աստիճանի գնահատման, ինչպես նաև բնակչությանը երկրաշարժից պաշտպանվելու վարքականոնների ուսուցումը։
«Ծառայությունը զարգանում է Ներքին գործերի նախարարության քաղաքական առաջնորդության ներքո և հանդիսանում է ոլորտի տարածաշրջանային և միջազգային առաջատար կառույցներից մեկը»,- ասվում է հաղորդագրությունում։
ՆԳՆ-ն կարևորել է նաև հասարակության մեջ անվտանգության մշակույթի ամրապնդումը, որի նպատակով աշխատանքներ են տարվում բնակչությանն աղետներից պաշտպանության կանոնների մասին իրազեկելու և իրազեկվածության բարձրացման ուղղությամբ։
Այսօր՝ դեկտեմբերի 7-ին, լրանում է Սպիտակի երկրաշարժի 36-րդ տարելիցը։ Ամեն տարի այս օրը եկեղեցիներում կազմակերպվում են հոգեհանգստյան արարողություններ, մարդիկ այցելում են գերեզմաններ՝ հարգելու զոհերի հիշատակը, իսկ Սպիտակում հարյուրավոր մարդիկ հավաքվում են հուշարձանների ու կոթողների մոտ, ծաղիկներ դնում և կիսվում ողբերգական հիշողություններով։
1988 թվականի դեկտեմբերի 7-ին՝ ժամը 11:41-ին, Հայկական ԽՍՀ հյուսիս-արևմուտքում տեղի էր ունեցել 8 բալ ուժգնությամբ ավերիչ երկրաշարժ, որն զբաղեցրել էր մոտ 30 հազար քառակուսի կիլոմետր տարածք՝ 1 մլն բնակչությամբ և խլել 25 հազար կյանք։ Երկրաշարժի էպիկենտրոնում՝ Սպիտակ քաղաքում, ցնցումների ուժգնությունը կազմել էր 10 բալ, Լենինականում (այժմ՝ Գյումրի)՝ 9 բալ, Կիրովականում (այժմ՝ Վանաձոր) 8 բալ՝ 12 բալանոց սանդղակով։ Ստորգետնյա ցնցումներն զգացվել էին նաև Երևանում և Թբիլիսիում։
